Lăi pơthâo hăng Khua git gai pơ ala mơnuih ƀôn sang dêh čar Bulgaria kơ hơdôm tơlơi djru akŏ pơdong lŏn ia, pơtom hiăp hăng čar rơngiao, hơdră bruă ling tơhan,ăt kah hăng hơdôm tơlơi đĭ kyar bơwih ƀong huă - mơnuih mơnam mơ̆ng Việt Nam, Khua dêh čar Phạm Minh Chính lăi, dua bơnah kiăng pơtrut ngă hrŏm laih anun čang rơmang jai hrơi hơmâo lu anom bơwih ƀong, ƀing tuh pơ alin mơ̆ng Việt Nam hăng  Bulgaria tuh pơ alin nao rai. Khua dêh čar Phạm Minh Chính kiăng dua bơnah pơsit ngă hrŏm bơwih ƀong jing gong tơmeh phun amăng tơlơi rô nao rai dua boh dêh čar, kiăng pơtrut đĭ tơlơi sĭ mơdrô dua bơnah kiăng tañ hơmâo 500 klăk dolar Mi/thun.

Ƀrô tal anai, Khua dêh čar Phạm Minh Chính bơni kơ Bulgaria djru pơtô ba hơdôm pluh rơbâo čô khua, čơđai gưl prong, čơđai kơsem min boh thâo Việt Nam, amăng anun hơmâo lu khua mua prong mơ̆ng Việt Nam; kiăng dua bơnah kơsem min hơdôm tơlơi gêh gal ngă hrŏm pơtô pơjuăt phrâo đah mơ̆ng pơhưč ƀing čơđai sang hră, mơnuih kơsem min boh thâo dua boh dêh čar tui hrăm pơ hơdôm boh sang hră mơ̆ng rim boh dêh čar amăng hơdôm tơlơi pơtô hrăm mơ̆ dua bơnah rơguăt bruă hloh.