Ƀơi mông bưp, Khua dêh čar Phạm Minh Chính hok mơ-ak ƀơi anăp tơlơi đĭ kyar kơjăp kơtang, amăng abih bang bruă laih anun sit nik mơ̆ng tơlơi rô nao rai giăng mah Việt Nam - Japan. Tui anun, Japan jing dêh čar ngă gŏp bơwih ƀong mrô sa kơ ODA, dong mrô 2 kơ mơnuih mă bruă, mrô 3 kơ tuh pơ alin hăng tal 4 kơ sĭ mơdrô; pơsit Việt Nam lêng kơ lăng Japan jing gŏp ngă hrŏm yôm phun hăng sui thun.

Khua dêh čar Phạm Minh Chính rơkâo Khua git gai pơ ala mơnuih ƀôn sang gơnong yŭ Japan Nukaga Fukushiro hăng Ƀirô khua pơ ala mơnuih ƀôn sang gơnong yŭ Japan lăng ba, djru pơđĭ tui hloh tơlơi ngă hrŏm amăng lu mơta bruă Việt Nam - Japan tui hơdră ngă hrŏm phrâo Gŏp ngă hrŏm yôm abih bang bruă; pơđĭ tui tơlơi ngă hrŏm, pơbưp nao rai dua ƀirô khua pơ ala mơnuih ƀôn sang dua bơnah, pơbưp khua mua gưl prong, khua mua pơ ala mơnuih ƀôn sang, khua mua thun hlăk ai, ƀing khua đah kơmơi pơ ala mơnuih ƀôn sang dua bơnah. Dong yua hăng pơtrut tui tơlơi rô nao rai bơwih ƀong, djru Việt Nam akŏ pơdong tơlơi bơwih ƀong rơngai, wai lăng mă pô.