Bơni kơ khua group Adani rai pơ Việt Nam hăng pơpŭ kơ Adani yua pơđĭ kyar na nao, Khua dêh čar pơdah pran jua hok mơak ƀuh bruă ngă pŭ ƀăn yôm pơphăn hlom bom plah wah dua boh dêh čar Việt Nam hăng India, hlăk pơđĭ kyar lu mơta bruă, khă tui anun tơlơi bơwih ƀong huă aka ƀu djơ̆ hnong anŏ gêh găl mơ̆ng dua bơnah dưi hơmâo.

Khua dêh čar Phạm Minh Chính hok mơak dưi thâo group Adani hơmâo pok anih  pơ ala mă bruă ƀơi Việt Nam hăng dăp akŏ bruă tuh pơ alin sui thun pơ Việt Nam. Khua dêh čar lăi pơtong, Việt Nam amra djru ba, ngă gêh găl hloh kơ djop anom bruă sĭ mơdrô, amăng anun anom bruă sĭ mơdrô mơ̆ng dêh čar India lăi hrŏm hăng Adani hnun mơ̆n pok pơhai bruă mă tuh pơ alin sĭ mơdrô hơmâo boh tŭ yua hăng hơđong kjăp ƀơi Việt Nam, djru hrŏm klă amăng bruă ngă pŭ ƀăn dua bơna hlom bom jai hrơi pơđĭ kyar.