Ƀơi mông tŭ jum, dua bơnah tŭ ư hrŏm kơtưn bruă pơblih nao rai grup khua mua pơprong, djop anom bruă hăng tơring čar čuă jơmư nao rai; lăi pơtong bruă bưp nao rai re se plah wah khua mua dua bơnah djru ngă kjăp tui, pơđĭ kơtang tơlơi đăo kơnang kơđi čar hăng pơtrut ngă hrŏm hlom bom dua bơnah. Khua mir sir, ơi Marcos tŭ ư hăng tơlơi rơkâo mơ̆ng Khua dêh čar, Phạm Minh Chính kơ bruă pơtrut ngă hrŏm djop bruă dua bơnah hơmâo lu tơlơi gêh găl kah hăng pơtô hăng pơjuăt, kơsem min ia rơgơi tơlơi kơhnâo phrâo, tuai čuă ngui, gru grua hiam, jĕ giăm mơnuih ƀôn sang, ngă hrŏm hơdôm bơnah tơring čar.

Pơčrong sai kơ bruă jar kmar hăng amăng kual, dua čô khua lăng yôm bruă dua bơnah dêh čar ngă hrŏm tong ten ƀơi djop anih jơnum pơprong amăng kual hăng ƀơi jar kmar kah hăng ASEAN, Sang gum hơbit djop dêh čar, APEC, ASEM; lăi pơtong bruă djă pioh tơlơi gum pơgôp nao rai hăng tơlơi gơgrong ba phun mơ̆ng kual ASEAN, ha pran jua akŏ pơdong sa khul mă bruă amăng kual ASEAN kjăp kơtang, tong ten gum pơgôp laih anun hrưn đĭ mă pô.