Ƀơi mông tŭ jum, dua bơnah lăng yôm bruă mă pơđĭ kyar kơtang tơlơi rô nao rai amăng djop bruă dua bơnah dêh čar dưi ngă thun blan rơgao. Tơlơi ngă giăng mah kơđi čar jai hrơi kjăp hăng đăo kơnang nao rai. Hơdôm mơta bruă ngă hrŏm phun kah hăng pơgang rơnuk rơnua, bơwih ƀong huă, gru grua, pơtô hrăm hăng ngă hrŏm plah wah djop tơring čar Việt Nam hăng Lao lêng kơ đing nao djơ̆ lăp laih anun hơmâo yak ngă bruă pơđĭ kyar phrâo.

Khua dêh čar Phạm Minh Chính rơkâo hơdôm ding jum, anom bruă dua bơnah dêh čar tañ jŭ yap glăi djop bruă ngă hrŏm; hơdai gum pơsir hĭ hơdôm tơlơi dŏ gun mơ̆ng djop kơčăo bruă ngă hrŏm phun; kơtưn ba tơlơi ngă giăng mah dua bơnah dêh čar yak nao amăng bơnah phrâo, jai hrơi pơđĭ kyar kơtang hloh hăng tŭ yua.