Tơlơi lăi pơthâo glăi hăng Khua dêh čar hăng Grŭp hyu mă bruă, Khua Jơnum min mơnuih ƀôn sang tơring čar Lâm Đồng Trần Văn Hiệp brơi thâo, thun 2022, khă dô̆ lu tơlơi tơnap, tơlơi lông, samơ̆ Ping gah, gong gai hăng mơnuih ƀôn sang tơring čar Lâm Đồng hmâo gum hrom hơbit, pơsit pran prong, gir run prong hăng ba glăi hơdôm bôh tơhnal klă, kah hăng pơhlôm abih bang amăng lu bruă, him lăng ngă tui ba glăi djơ̆ tơhnal hăng hloh kơ anun abih bang 18/18 tơhnal ba tơbiă pơđĭ kyar bơwih ƀong – mơnuih mơnam thun 2022, amăng anun hloh kơ 6 tơhnal pơkă.

Tơring čar Lâm Đồng ba tơbiă hăng Gong gai dêh čar, Khua dêh čar, hơdôm Ding jum, gơnong bruă dêh čar sa dua bôh yôm bơdjơ̆ nao pơdŏng anom mă yua kah hăng: djru tơring čar pơkra jơlan đuăi hmar Bảo Lộc – Liên Khương; tañ pok pơhai rơwang bruă jơlan đuăi hmar Nha Trang – Liên Khương, Liên Khương – Buôn Ma Thuột hăng đing nao  pơkra sa dua ară jơlan hmâo tơhnal tô nao rai hơdôm kual pơkon. Tơdơi kơ hmư̆ tơlơi gum pơhiăp, klah čun mông mă bruă, Khua dêh čar ta ơi Phạm Minh Chính hơ-ư̆č hmưi, bơni mơ̆ Ping gah, gong gai, mơnuih ƀôn sang, anom bơwih ƀong tơring čar Lâm Đồng dưi ngă amăng hơdôm thun rơgao, biă ñu amăng thun 2022 tơlơi bơwih ƀong – mơnuih mơnam hơkrŭ glăi tañ. Pơ̆ anăp anai Khua dêh čar rơkâo Lâm Đồng pơtrut pơplih phrâo hơdră đĭ kyar tui hluai amăng pơplih phrâo pơčeh phrâo, đĭ rơnoh, mă yua bôh thâo phrâo măi mok rơnuk anai, biă ñu hơdôm bruă hmâo tơhnal prong kah hăng hyu čuă ngui, bruă bơwih brơi, logistic, bruă đang hmua... hrưn đĭ jing pran pơtrut pơđĭ kyar mơng kual Dăp Kơdư hăng đơ đam dêh čar.

Tơdơi kơ hmư̆ tơlơi pơgôp hiăp, pơčrông sai pơhiăp đĭ ƀơi mông jơnum, Khua dêh čar ơi Phạm Minh Chính hơmâo pơblang tong ten tơlơi gêh găl, hnong pơhno hăng hơdôm tơlơi kơƀah amăng kual Dap Kơdư. Laih dơ̆ng pơčrâo rơđeh, tơhnal pơtrun hơdră mă bruă mơ̆ng kơnuk kơna, mơ̆ng anun pơdah thâo tơhnal pơkă pơtrut pơđĭ kuar GRDP pơkă dưm dưm mơ̆ng 7-7,5%; truh thun 2030, GRDP pơkă dưm dưm hnong pơhrui glăi rrĭm čô mơnuih 130 klăk prăk, dưm dưm hăng 5000 USD. Mrô đơ đam plơi prong hơmâo rơbêh 37% truh 40%, mrô să ngă djơ̆ tơhnal pơkă plơi pla phrâo 85%.

Hlâo kơ anun, Khua dêh čar ơi Phạm Minh Chính hăng Grup hyu mă bruă mơ̆ng Kơnuk kơna nao čuă kông ty mơnuih ƀôn sang ngă pô anăn Dalt Hasfarm dơnong pla hăng sĭ mơdrô bơnga, pơjeh bơnga, than bơnga hăng ƀưh bơnga ƀơi plơi Đà Lạt.