Tlam mơmŏt lơ 23/11, Khua dêh čar ơi Phạm Minh Chính hăng bơnai ñu laih anun grup khua mua kơnuk kơna dêh čar Việt Nam pơpĕ đuăi laih mơ̆ng dêh čar Nam Phi, pơđut jơlan hơdră tal jơnum hrŏm khua mua pơprong G20 thun 2025 hăng lu bruă mă dua bơnah dêh čar.

Hăng tơlơi pơƀuh ƀô̆ mơta kah hăng tuai jak nao jơnum hrŏm mơ̆ng Khua G20, Khua dêh čar nao jơnum pơƀuh ƀô̆ mơta amăng mông jơnum prong G20, hơmâo bưp khua mua djop dêh čar ngă ding kơna, dêh čar ngă tuai arăng jak nao jơnum hăng anom bruă jar kmar nao pơhmư̆.

Ƀơi dua wơ̆t pơčrong sai kơ bruă pơđĭ kyar hơđong kơjăp, pơčrong hrŏm hăng lu bruă mă laih anun pơgôp hiăp hrŏm jơnum G20 anăp nao kiăng rŏng lŏn tơnah hrưn đĭ mă pô, Khua dêh čar rơkâo G20 pơtrut bruă ngă hrŏm jar kmar pơpŭ tơlơi phiăn, pơsir tơlơi rung răng, djă pioh bruă sĭ mơdrô lu bơnah hăng WTO pô ngă gong jơlan, pơgang ba glông bruă yua prăk kăk tơpă rơgoh. Ƀrô djơ̆ tal anai, Việt Nam hăng Nam Phi pôr pơthâo pơđĭ tui tơlơi ngă giăng mah jing bơnah ngă hrŏm yom pơphăn, pơtrut tơlơi bơwih ƀong huă, sĭ mơdrô, tuh pơ alin, anăp nao tơhnal pơkă ba rơnoh prăk sĭ mơdrô dua bơnah kiăng hơmâo mơ̆ng 4-5 klai USD amăng 2-3 thun pơ anăp.