Tlam lơ 14/1, Khua dêh čar ơi Phạm Minh Chính git gai Jơnum tal 6 mơng Khul git gai dêh čar pok pơhai ngă tui tơlơi ƀuăn mơng Việt Nam amăng Jơnum COP26. Pơđut mông jơnum, Khua dêh čar pơsit tong bruă Việt Nam ba tơbiă hơdôm tơlơi ƀuăn kơtang tit amăng COP26, amăng anun hơmâo hơnong pơkă pơhlôm asăp hơƀak jrak dŏ “0” amăng thun 2050, anai lĕ tơlơi pơtrun lăp djơ̆, pơdah tơlơi gơgrong prong hloh hăng jar kmar hăng yua bruă pơđĭ kyar hơđong kjăp amăng lŏn ia. Khua dêh čar lăng yôm pran gơgrong, đing nao bruă mă hăng tơlơi gir run mơng djop ding jum, gơnong bruă, ƀon lan, anom bơwih ƀong sĭ mơdrô hăng mơnuih ƀôn sang amăng pok pơhai hơdôm bruă jao hơmâo ba tơbiă.

Tui Khua dêh čar, ngă tui hơnong pơkă pơhlôm asăp hơƀak jrak dŏ “0” lĕ tơlơi lông prong samơ̆ tơlơi anai amra pok rai tơlơi dưi kiăng pơplih amăng bơwih ƀong huă tui jơlan gah mơtah, hơđong kjăp, hrưn đĭ pran ngă mă pô, gơgrong mă hăng pran bơkơtưn. Pơhlôm hlâo ayuh hyiăng pơplih sat lĕ bruă khŏm ngă, amăng anun mơnuih ƀôn sang hăng anom bơwih ƀong sĭ mơdrô lĕ akŏ phun rah, ƀing ngă pô, mut hrŏm hăng ngă tui djop tơlơi glăm ba mơng ƀing gơñu pô.