Tlam lơ 22/9, ƀơi sang bruă Kơnuk kơna dêh čar, Khua dêh čar ơi Phạm Minh Chính git gai jơnum lok I, Khul git gai mơ̆ng gơnong dlông kơ jơlan hơdră djru sang dŏ hăng wai lăng tong ten bruă sĭ mơdrô gơnam prong lŏn mơnai.

Khua dêh čar rơkâo, ngă pơrơđah hloh hơmâo hă ƀô̆ tơlơi pôr tă tăn nua sĭ mơdrô lŏn mơnai gơnam tam prong pioh ƀư̆ pơkra glăi, biă mă ñu khom lăi glăi tơlơi tơña, yua hơgĕt nua sĭ anih dŏ amăng sang dlông tal pơmă đơi hăng aka ƀu trun ôh…

Tui hăng tơlơi lăi pơthâo ƀơi mông jơnum, amăng 9 blan giăm rơgao, ƀơi dêh čar hơmâo 1.816 kơčăo bruă pơdong sang dŏ ƀơi ƀôn prong phrâo pok pơhai. Mrô sĭ mơdrô lŏn mơnai, sang dŏ hrơi blan rơgao hơmâo 430 rơbâo wơ̆t; nua sĭ sang,.anih dŏ ră anai pơmă đơi.

Ƀơi mông jơnum, Khua dêh čar lăi rơđah: jơlan hơdră kơnuk kơna djru nua sang dŏ hăng tơlơi sĭ mơdrô sang dŏ, lŏn mơnai lĕ hơmâo tơlơi gơgrong yom biă mă,  pơtrut rơnoh pơđĭ kyar, pơđĭ tui anŏ tŭ yua hiam amăng tơlơi hơdip mơda mơnuih ƀôn sang, ngă pơblih tui ƀô̆ mơta amăng dêh čar. Khua dêh čar pơtă pơtăn, jơlan hơdră djru mơnuih mơnam, pơhlôm brơi mơnuih ƀôn sang dưi blơi sang dŏ, lŏn ngă sang hăng apah sang dŏ, pơhlom brơi tơlơi dưi ană mơnuih hăng hơmâo anih dŏ hơđong či bơwih ƀong huă. Khua dêh čar lăi pơtong, tơlơi juăt lăi nao “abih bang yua kơ mơnuih ƀôn sang, yua kơ lŏn ia, khut khăt ngă bruă, gir run kơtang hloh, khom ngă bruă djơ̆ lăp, ngă rơđah bruă hơgĕt, hrơi blan, tơlơi dưi, tơlơi glăm ba kơ pô hlơi, khom rơđah rơđong; pơpha bruă mă khom kiăo tui 6 mơta tơlơi rơđah rơđong tong ten: djơ̆ pô, djơ̆ bruă, djơ̆ hrơi blan, djơ̆ tơlơi dưi, djơ̆ pô glăm ba hăng rơđah gơnam hơgĕt kiăng pơjing rai anŏ pơblih phrâo, kơtang hloh pơđĭ kyar pơdong sang dŏ hăng anih sĭ mơdrô lŏn mơnai, sang dŏ.