Tui hăng tơlơi lăi pơthâo ƀơi mông jơnum, tal ia ling dăo yua kơthel hơjan hlim rơgao ngă kơ mrô sang dlưh hăng ia kor răm khom man pơdong glăi phrâo truh 1.597 boh sang, truh ră anai ngă giong laih 671 boh sang, mrô dŏ glăi hlăk dŏ man pơdong. Mrô sang kơnong răm đôč huăi dlưh truh 34.800 boh sang, ră anai ngă giong laih.

Khua mua tơring čar Dak Lak brơi thâo, pơ anăp anai ăt khom jŭ yap glăi, man pơdong sang pơhlôm brơi anih ia ling dăo kơ mơnuih ƀôn sang. Tơring čar Gia Lai man pơdong 38 bit anih pơdong plơi phrâo kơ mơnuih ƀôn sang, khom pơdŭ đuăi mơnuih ƀôn sang mơ̆ng anuh ia juăt lip, nao dŏ pơ anih phrâo. Ding jum ling tơhan iâu pơtum, brơi nao 176.000 čô khua mua, ling tơhan, tơhan plơi djru ba hơdôm rơbâo boh rơdêh, gơnam yua mă bruă ngă hrŏm gong gai plơi pla djru man pơdong glăi sang kơ mơnuih ƀôn sang. Ding jum kông an ăt brơi nao 11.000 čô khua mua, tơhan djru mơnuih ƀôn sang pơsir tơlơi răm ƀăm lŏn adai ngă. Ƀơi mông jơnum, Khua dêh čar ơi Phạm Minh Chính pơdah rai pran jua hơ̆k mơak, lơ̆m ƀuh bruă ngă anăn Bruă mă Quang Trung, tơdơi kơ 1 blan đôč hơmâo ngă giong abih laih hơdôm mrô sang ming pơkra glăi, djơ̆ tơhnal pơkă. Khua dêh čar brơi ngă tañ hloh, gir run truh lơ 15/1/2026, khom man pơdong abih sang dlưh, kiăng mơnuih ƀôn sang hơmâo sang dŏ hlâo kơ jơnum ruah khua ping gah dêh čar tal XIV