Amăng mông bưp, Khua dêh čar pơpŭ ƀing kơhnâo kơhnăk, ƀing wai lăng gơnong bruă ia jrao, ƀing nai ia jrao, ơi ia jrao 20 boh hră: “Tŏ tui gru hiam-Kjăp bruă ia jrao-Hrưn đĭ bruă pơjrao-Găn rơgao tơnap tap-Abih yua ană mơnuih”. Khua dêh čar lăi pơtong, hrơi pơpŭ nai ia jrao Việt Nam lơ 27/2 lĕ hrơi mông yôm phăn kiăng Kơnuk kơna hăng abih bang pơdah pran hơdor tơngia kơ djop rơnuk nai ia jrao yua kơ hơdôm tơlơi pơgôp prong, abih pran jua hăng kret kruai brơi kơ bruă bơwih brơi, wai pơgang hăng pơhlôm brơi tơlơi suaih pral mơnuih ƀôn sang. Khua dêh čar pơsit tong, Ping gah, Kơnuk kơna pơsit wai pơgang, bơwih brơi hăng pơhlôm brơi tơlơi suaih pral mơnuih ƀôn sang lĕ bruă jao kơđi čar prong hloh, jing tơlơi đing nao phun amăng hơdôm hơdră bruă, jơlan gah pơđĭ kyar; anai lĕ tơlơi glăm ba mơng djop anih anom kơđi čar, abih bang mơnuih mơnam hăng mơnuih ƀôn sang.

Yak nao rơnuk pơđĭ kyar phrâo amăng lŏn ia, hăng hơnong pơkă anăm pơdơi pơhlôm  tơlơi suaih pral klă tui wŏt drơi jăn pran jua, jai hơdip sui, tơlơi hơdip mơnuih ƀôn sang Việt Nam jai hrưn đĭ, Khua dêh čar rơkâo tŏ tui pơgiong tơhnal pơkă, hơdră bruă hăng pok pơhai tŭ yua hơdôm tơlơi pơkă amăng tơlơi phiăn kơ bruă ia jrao; đing nao hrưn đĭ klă amăng bruă ia jrao, sit biă ñu lĕ bruă ia jrao wai pơgang tui tlôn, ia jrao ƀơi ƀon lan, tŏ tui pran kơtang mơng ia jrao pơjrao hăng kyâo jrao. Dưm dăp anih anom ia jrao brơi hơbot, tŭ yua, pơhlôm pơlir kơplah wah djop gưl amăng bruă mă. Pơgiong ngă tui tơlơi glăm ba, bruă jao, dưm dăp sang ia jrao gưl să.