- Lơ 25/3, Khua dêh čar ơi Phạm Minh Chính git gai jơnum khul apăn bruă kơnuk kơna, hmư̆ Ding jum pơtô pơjuăt hăng Ding jum ia jrao lăi pơthâo kơ akŏ bruă yôm phun mơ-it Ding jum kơđi čar. Amăng mông jơnum, Khua dêh čar ơi Phạm Minh Chính rơkâo ƀơƀrư̆ pok prong pơtô tơlơi Angle amăng sang hră gưl sa hăng sang hră gưl tlâo. Črăn tơlơi pơtrun mơng Ding jum pơtô pơjuăt ba tơbiă hơnong pơkă kiăng hrưn đĭ klă dong amăng pơtô hrăm; pơjing, pơđĭ kyar djop mơta brơi mơnuih Việt Nam kiăng hơdip hiam, thâo thăi, gru grua, suaih pral, jing mơnuih thâo rơgơi, thâo pơhiăp tơlơi dêh čar tač rơngiao, sit ñu lĕ tơlơi Angle amăng hơdôm boh sang hră.

Khua dêh čar ơi Phạm Minh Chính rơkâo Ding jum pơtô pơjuăt tŏ tui mă tơlơi pơgôp hiăp amăng jơnum, pơgiong hăng pơkâo ba tơbiă jơlan hơdră tui hơnong pơkă dêh čar kơ bruă pơplih phrâo, hrưn đĭ klă dong amăng pơtô hrăm. Jơlan hơdră ba tơbiă hơnong pơkă ƀơƀrư̆ pơtô brơi tơlơi Angle amăng sang hră gưl sa hăng gưl tlâo. Pơtô brơi ană mơnuih kiăng đing nao tong ten hrŏm hăng hơdip hiam, thâo thăi, suaih pral, hiam drơi jăn. Hơdip hiam, thâo thăi hơmâo lăi nao lu samơ̆ suaih pral, hiam drơi jăn amăng hrơi blan rơgao aka ƀu đing nao lu ôh. Laih dong đing nao ƀing čơđai kual ataih, asuek, kual giăm guai, bul pơtâo dong.