Khua dêh čar pơtrun hiăp kơ djop tơring čar tañ rŭ glăi gong hrĕ apui lơtrik, ia hơdjă, jơlan glông nao rai, hrĕ dăng kông. Ăt khom jŭ yap glăi, pơtum djop rơdêh đĭ djru pơdŭ pơgiăng gơnam kơ mơnuih ƀôn sang pơgang hlâo anăm lui ư̆ rơpa, pơdŭ đuăi mơnuih ƀôn sang nao pơ anih rơnuk rơnua hơđong; pơhlom djop braih huă ƀơk kơ mơnuih ƀôn sang amăng lơ 14/11; iâu pơthưr djop sang bruă mơdrô, mơnuih hơmâo pran jua čơmah djru ba tơlơi khăp pap tơdruă djuai ania, tơlơi djru ba ƀing gơ̆p, mơnuih ƀôn sang, djru kiăng găn rơgao tơlơi lông lăng tơnap tap. Hlâo kơ anun, amăng tal nao mă bruă ƀơi tơring čar Gia Lai, yang hrơi dong lơ 13/11, Khua dêh čar nao čuă, mă bruă hăng khua tơhan pơgang guai dêh čar tơring čar Gia Lai, git gai jơnum hăng djop ding jum, anom bruă, khua mua tơring čar Gia Lai kơ bruă mă rŭ pơdong glăi tơlơi răm ƀăm truh kơthel ngă.

Khua dêh čar rơkâo kơ tơring čar mă yua 60 klai prăk pioh pơdong plơi pla phrâo anih dĭ tañ kơ mơnuih ƀôn sang. Khom ngă pơhơđong brơi anih dŏ, gơnam yua, bruă mă, sĭ mơdrô tañ pơwơ̆t glăi kah hăng tơđar, pơtrun hiăp brơi mă bruă khut khăt hloh kiăng tañ hơđong hăng bơwih ƀong huă, sĭ mơdrô. Sang bruă prăk ăt khom pơhrơ̆i hnưh kơ mơnuih ƀôn sang hăng ĕp hơdră brơi čan phrâo kiăng rŭ glăi bruă mă bơwih ƀong huă, Khua dêh čar ăt rơkâo brơi ngă pơrơgoh anih dŏ jum dar ayuh hyiăng tơdơi kơ kơthel pưh nao, kih rơmet hĭ djah djâo. Djop sang bruă mă jia, prăk apah brơi lui jăng jai hăng mơnuih ƀôn sang laih anun sang bruă mơdrô răm ƀăm yua kơthel ngă, ming pơkra glăi sang hră, sang ia jrao tañ. Tơring čar Gia Lai rơnoh răm ƀăm yua kơthel ngă truh 5.900 klai prăk, Khua dêh čar rơkâo Ding jum prăk kăk kiăng jŭ yap pơkă hnơ̆ng tơlơi pơhing djru ba gêh găl, hmao kru.