Khua dêh čar ơi Phạm Minh Chính kĭ hră kông điện mrô 176 pơtrun hiăp brơi pơsir tañ tơlơi răm ƀăm truh kơthel tal 10 hăng ia ling dăo ngă. Truh yang hrơi dong, lơ 29/9, kơthel ngă rai 11 čô mơnuih djai, 13 čô mơnuih dŏ rơngiă, aka ĕp ƀuh, 33 čô mơnuih rơka rơkač, lu sang dŏ, anih anom mă bruă pơkra ming dlưh rai. Khua dêh čar mơ-it hiăp juh alum hning rơngôt hrŏm sang anŏ hơmâo mơnuih djai, rơngiă, ruă nuă laih anun pơtrun hiăp khua jơnum min mơnuih ƀôn sang djop tơring čar, ƀôn prong pơdjơ̆ nao khom đing nao bruă hơduah ĕp, pơklaih brơi mơnuih hơmâo tơlơi truh, sang anŏ răm ƀăm yua, djru pơjrao brơi mơnuih rơka rơkač, tañ rŭ pơdong glăi dŏ, anŏ đih, rŭ glăi jơlan glông nao rai, hrĕ apui lơtrik, hrĕ dăng kông, ia yua kơ mơnuih ƀôn sang. Khua dêh čar pơtrun hiăp kơ Ding jum ling tơhan, ding jum kông an hăng djop sang bruă kơnuk kơna brơi git gai djru ba, ngă hrŏm tơhan plơi, kông an să nao djru pơklaih mơnuih ƀôn sang hơmâo tơlơi truh, kiăng pơgang rơnuk rơnua hơđong.

Djop ding jum, anom bruă, tơring čar khom lăi pơthâo bruă mă pơhlôm pơgang kơthel, ia ling dăo ngă, kiăng brơi khua dêh čar thâo, hlâo kơ 3 mông tlam rim hrơi, pioh hmao pơsir hĭ hơdôm tơlơi či kiăng. Mơguah lơ 29/9, ƀơi tơring čar Nghệ An, Kơ-iăng khua dêh čar ơi Trần Hồng Hà hơmâo jơnum pơƀuh ƀô̆ mơta lăng nao rai amăng tivi hăng djop tơring čar, plơi pla anih hơmâo tơlơi truh, kơthel pưh nao brơi pơsir tañ tơlơi răm ƀăm ngă. Tui hăng tơlơi lăi pơthâo, kiăo tui kơthel hơmâo hơjan hlim ia ling dăo kơtang amăng kual hơdôm tơring čar Thanh Hóa, Hà Tĩnh, kual lŏn dăo gah Kơdư dêh čar, pơ tơring čar Phú Thọ. Ră anai djop ia krông, ia ania anet prong ƀơi 3 boh tơring čar Thanh Hóa, Hà Tĩnh hăng Nghệ An lêng kơ đĭ kơtang hơnơ̆ng pơhŭi mrô 3 anun yơh djop tơring čar kiăng pơtum bong glăi tong ten hăng ia ling dăo.