VOV4.Jarai - Mơguah lơ 22/9, ƀơi Ƀirô mă bruă Gong gai dêh čar ta, Khua dêh čar ta ơi Phạm Minh Chính git gai mông jơnum Gong gai dêh čar tui akô̆ bruă čih pơkra tơlơi phiăn blan 9/2022. Pơhiăp amăng mông jơnum, Khua dêh čar ta ơi Phạm Minh Chính lăi rơđah, tơlơi bơwih ƀong rŏng lŏn tơnah lăi hrom glăk bưp lu tơlơi tơnap, đĭ kyar hmâo jơlan gah hrŏ trun, đĭ nua lĕ lu tui.

Jê̆ hăng anai, hơdôm sang prăk dêh čar Mi, EU, Anglê, Japan hmâo jơlan gah đĭ kơmlai, đĭ nua prăk lĕ bơbeč truh ngă hrŏ trun nua prăk hơdôm bôh dêh čar, bơdjơ̆ nao prong biă hơdôm bôh dêh čar, amăng anun hmâo Việt Nam. Gong gai khom ba tơbiă sa dua bruă pơsir kiăng bŏng glăi hăng tơlơi tơnap lom anai. Amăng bruă jơnum Khua dêh čar rơkâo hơdôm ding kơna Gong gai gum pơhiăp hơdôm rơwang bruă tơlơi phiăn, biă ñu lĕ tơlơi pơkă kual, anai lĕ tơlơi prong hăng tơnap, yua anun Khua dêh čar rơkâo pioh mông, pran jua, bôh thâo ia rơgơi gum pơhiăp kơ hơdôm bôh yôm phun mơng hơdôm rơwang bruă tơlơi phiăn./.

Siu H’ Prăk: Pơblang