VOV4.Jarai - Lơ 18/10, Khua dêh čar ta ơi Phạm Minh Chính hmâo bơkơtuai laih amăng telephone hăng Khua dêh čar Australia Anthony Albanese kiăng bơkơtuai hơdôm bruă kơtưn tơlơi rô nao rai dua bơnah dêh čar, biă ñu pơtrut gum hrom bơwih ƀong – sĭ mơdrô – tuh pơplai, anăp nao hơdor glăi 50 thun hrơi pơdŏng bruă pơtom hiăp dua bôh dêh čar thun 2023.

Khua dêh čar ta ơi Phạm Minh Chính bơkơtuai hăng Khua dêh čar Australia

Khua dêh čar ta ơi Phạm Minh Chính hăng Khua dêh čar Australia Anthony Albanese hmâo yap glăi laih hơdôm yak pơđĭ kyar klă hiam hăng ba glăi bôh tơhnal amăng tơlơi rô nao rai dua bôh dêh čar hơdôm hrơi rơgao. Dua gơñu pơsit yôm bruă dua bôh dêh čar djă pioh hơdôm bruă mă bơkơtuai gah grŭp, pơbưp gưl dlông, amăng anun hmâo bruă prăp lui kơ tal nao čuă Australia pơ̆ anăp mơng Khua git gai wai lăng pơ ala mơnuih ƀôn sang dêh čar ra ơi Vương Đình Huệ. Khua dêh čar ta ơi Phạm Minh Chính rơkâo Australia djru dong măi mok hăng pok anih anom sĭ mơdrô hloh dong kơ bơnga bôh troh hăng akan hơdang mơng dêh čar Việt Nam. Khua dêh čar ta ơi Phạm Minh Chính ăt rơkâo mơn Australia pơtrut pơsur anom bơwih ƀong Australia kơtưn tuh pơplai hloh dong amăng dêh čar Việt Nam./.

VOV/Siu H’ Prăk pơblang