Amăng mông bơkơtuai, dua Khua dêh čar tŭ ư hrŏm kơtưn đĭ dong hơdôm bruă hyu čuă, pơbưp gưl dlông hăng hơdôm gưl amăng abih bang hơdôm glông pôr pơhing Ping gah, Kơnuk kơna, Gong gai hăng Khua pơ ala mơnuih ƀôn sang; biă ñu tŭ ư amra pơphun bruă jơnum pơbưp tui tơđar kơplah wah Khua dêh čar dua bôh dêh čar kiăng lăi pơthâo nao rai kơ gum hrŏm dua bơnah hăng hơdôm tơlơi hơdai đing nao.

Dua Khua dêh čar lăi rơđah kiăng pok pơhai ba glăi bôh tŭ yua bruă gum hrŏm bơwih ƀong Mơtah – Bơwih ƀong Mrô, pơjing phun than ngă brơi gum hrŏm Việt Nam hăng Singapore jing gru than kơ pơgi kơdih anai amăng ASEAN; pơsit yôm bruă dua bơnah hmao tlôn ngă giong bruă pơđĭ tui Tơlơi pơkôl tô nao rai dua bruă bơwih ƀong Việt Nam hăng Singapore. Khua dêh čar ta, ơi Phạm Minh Chính rơkâo Singapore ngă gal brơi kơtưn blơi gơnam mơng dêh čar Việt Nam; pok prong tuh pơplai amăng hơdôm bruă phun hăng gah ƀut đing nao hlâo mơng Việt Nam; djru Việt Nam pơđĭ kyar hơdôm bruă măi mok djru kơ hơdôm bruă pơkra gơnam tam, kah hăng tơčôh mơñam, pơkra gơnam mă kyâo, pŏng pơkra ƀat tô, pơđĭ kyar anom mă yua măi mok, put jrao, ia jâo./.