Ƀrô djơ̆ tal anai, Khua dêh čar ta amra hmâo hơdôm mông bưp dua bơnah, pơbưp hăng bơkơtuai hăng khua mua gong gai, Khua pơ ala mơnuih ƀôn sang dêh čar Mi, nao pơhmư̆ sa dua bruă mă bơdjơ̆ nao bơwih ƀong, sĭ mơdrô kơplah wah dua bôh dêh čar.

Črăn pơdơi tơkai blung a mơ̆ng Khua dêh čar ta, ơi Phạm Minh Chính ƀơi dêh čar Mi lĕ San Francisco hăng lu bruă mă yôm phăn. Biă ñu, Khua dêh čar ta, ơi Phạm Minh Chính amra nao pơhmư̆ hăng pơhiăp amăng mông Bơkơtuai anom bơwih ƀong Việt Nam – Mi thun 2023 hăng anăn ñu “Pơđĭ tui tơlơi rô nao rai Việt Nam hăng Mi hăng tơhnal gal kơ anom bơwih ƀong dua bôh dêh čar”. Khua dêh čar ta ăt amra nao čuă mơn sa dua bôh anom bơwih ƀong tui hơdră phrâo mơng Mi ƀơi Klung hup Silicon; čuă hăng mă bruă ƀơi sang bruă pơkra chip NVIDIA; čuă mă bruă ƀơi sang bruă Meta.

Tơdơi kơ nao truh pơ plơi prong San Francisco, ala čar California, Mi, Khua dêh čar ơi Phạm Minh Chính hơmâo mông bưp hăng pran jua khăp ƀu-eng hăng mơnuih ƀon sang Việt Nam ƀơi Mi. Amăng mông bưp, ƀing pơ ala brơi mơnuih ƀon sang dŏ hơdip pơ dêh čar Mi pơdah pran jua hok mơ-ak lơm Việt Nam hăng Mi jing bơnah ngă hrŏm djop mơta; sit biă ñu hok mơ-ak hăng hơdôm tơlơi dưi amăng pơđĭ kyar bơwih ƀong huă -mơnuih mơnam mơng dêh čar amăng thun blan laih rơgao, sit biă ñu amăng hơkrŭ glăi hăng pơđĭ kyar bơwih ƀong huă mơnuih mơnam tơdơi kơ abih klin Covid-19, tŏ tui mut hrŏm jar kmar dơlăm tui, hrưn đĭ kơdrưh ang, tơlơi đăo gơnang amăng jar kmar.

Pơsit tong lĕ bơnah yôm phăn, ƀu dưi pơčlah mơng djuai ania Việt Nam anun lĕ hơmâo Ping gah, kơnuk kơna pơsit, mơnuih dŏ hơdip pơ tač rơngiao čang rơmang tŏ ngă tui hơdră bruă mut hrŏm sa djuai anai, ha kơtăk drah kiăng mơnuih dŏ hơdip pơ tač rơngiao tŏ tui gum pơgôp lu ƀiă dong amăng bruă pơjing lŏn ia hăng pơtrut tơlơi rô nao rai Việt Nam-Mi. Khua dêh čar ơi Phạm Minh Chính brơi thâo, amăng thun blan pơđĭ kyar tơlơi rô nao rai Việt Nam-Mi, mơnuih ƀon sang Việt Nam ƀơi Mi lăi hrŏm hăng ƀơi California lăi phara hơmâo tơlơi gum pơgôp yôm phăn, Khua dêh čar lăi pơtong, Ping gah, kơnuk kơna lêng kơ đing nao mơnuih ƀon sang Việt Nam dŏ hơdip pơ tač rơngiao, čang rơmang pơ anăp anai, anom bơwih ƀong sĭ mơdrô, ƀing rơgơi kơhnâo Việt Nam ƀơi Mi amra tŏ tui djru pơđĭ kyar lŏn ia ta.