VOV4.Jarai - Lơ 19/10, Khua dêh čar ta ơi Phạm Minh Chính hmâo git gai mông jơnum tal 2 mơng Grŭp črâo ba bruă pơplih pơkra bruă čar mơng Kơnuk kơna. Pơhiăp amăng mông jơnum, Khua dêh čar ta ơi Phạm Minh Chính lăi rơđah, amăng 9 blan phrâo rơgao, bruă pơplih pơkra bruă čar dưi pok pơhai ngă tui ha amăng plĕ hăng hmâo laih hơdôm bôh tơhnal klă amăng hơdôm mơta bruă mơng Jơlan hơdră abih bang pơplih pơkra bruă čar kơnuk kơna, djru yôm phăn amăng pơđĭ kyar bơwih ƀong mơnuih mơnam mơng lŏn ia.

Khua dêh čar ta ơi Phạm Minh Chính pơhiăp amăng mông jơnum

Khă hnun hai, hrom hăng hơdôm bôh tơhnal dưi ngă, ăt dô̆ mơn hơdôm tơlơi akă dưi ngă, akă gal. Khua dêh čar rơkâo ding kơna amăng Grŭp črâo ba khom pơsit rơđah bruă mă, bruă gơgrong mơng pô pioh kơ bruă pơplih pơkra bruă čar mơng lŏn ia, mơng ding jum, gơnong bruă pô; mơng anun, khom gơgrong hlâo gum hrom kơjăp hăng hơdôm ding jum, gơnong bruă hăng Jơnum min mơnuih ƀôn sang hơdôm bôh tơring čar, ƀôn prong lom pok pơhai ngă tui hơdôm bruă jao dưi pơpha, pơtrut kơtang pơplih pơkra bruă čar amăng hơdôm blan rơnuč thun 2022, hăng hơdră ngă phrâo, ba glăi bôh tơhnal tui jơlan gah bruă mă mơng Kơnuk kơna “Gum hrom hơbit djơ̆ phiăn, gơgrong hlâo ngă juăt, pơhlôm ba glăi bôh tơhnal, hơkrŭ bruă pơđĭ kyar”./.

VOV/Siu H’ Prăk pơblang