VOV4.Jarai - Mơguah tom brơi (10/10), Hrơi pơplih mrô dêh čar hmâo pơphun ƀơi Anom Jơnum Khua pơ ala mơnuih ƀôn sang hăng tơlơi nao pơhmư̆ mơng Khua dêh čar ơi Phạm Minh Chính hăng mơ-ĭt tơlơi pơhing mơng Kơnuk kơna amra pơtrut kơtang pơplih mrô dêh čar. Pơhiăp amăng mông ngă lơphet, Khua dêh čar pơsit, Ping gah, Kơnuk kơna ta lăng yôm na nao hăng lăng pơplih mrô lĕ sa amăng hơdôm bruă mă phun lom pơplih phrâo măi mok, pơplih phrâo lŏn ia.

Khua dêh čar ơi Phạm Minh Chính pơhiăp amăng mông jơnum

Hră jơnum tal 13 mơng Ping gah lăi nao truh bruă pơplih mrô, bơwih ƀong mrô, mơnuih mơnam mrô amăng hơdôm tơhnal ba tơbiă, tơlơi pơmin pơđĭ kyar hăng pơplih pha ra bruă mă. Tơlơi pơtrun pơsit mơng Ding jum kơđi čar hmâo lăi rơđah tơlơi kiăng ječ pơtrut kơtang lom pơplih mrô. Jơlan hơdră pơplih jơlan gah pơplih mrô dêh čar truh kơ thun 2025, pơsit jơlan gah truh kơ thun 2030 mơng Kơnuk kơna pok pơhai tui jơlan gah pơplih mrô abih bang hăng tơlơi gum hrom mơng mơnuih ƀôn sang, plơi pla, anom bơwih ƀong hăng ƀirô mă bruă čar./.

VOV.VN čih

Siu H’ Prăk pơblang