Tui hăng kơčăo bruă, Khua dêh čar ta ơi Phạm Minh Chính amra nao pơhmư̆ hăng hmâo hơdôm tơlơi pơhiăp yôm phăn amăng 3 mông jơnum lu bơnah hmâo Jơnum gưl dlông GMS tal 8, Jơnum Gưl dlông ACMECS tal 10, Jơnum gưl dlông CLMV tal 11; pơphun hơdôm bruă bưp dua bơnah hăng sa dua bơnah gum hrŏm yôm phăn; pơhmư̆ hơdôm bruă lăi pơhưč tuai čuă ngui Việt Nam, bơkơtuai hăng anom bơwih ƀong; čuă sa dua anih anom bơwih ƀong, logistic ƀơi Côn Minh hăng Trùng Khánh, Khač.

Amăng hơdôm hrơi mă bruă, Khua dêh čar ta pơkă hlâo bưp lu bơnah gum hrŏm yôm phăn, hmâo tơhnal gal gum hrŏm hăng Việt Nam amăng abih bang hơdôm gưl. Amăng anun hmâo hơdôm bơnah gum hrŏm pơđĭ kyar, hơdôm hơdră pơkă prăk kak lu bơnah, hơdôm ƀirô gah dêh čar, ding jum, gơnong bruă, tơring čar, ƀôn prong, anom bơwih ƀong dêh čar Khač./.