Pơhiăp amăng mông bơkơtuai, Khua dêh čar ta ơi Phạm Minh Chính iâo pơthưr hơdôm bôh dêh čar khom hmâo pran pơsit bruă kơđi čar dlông hloh, ngăn rơnoh prong hloh, bruă ngă khut khăt hloh kơ hơdôm jơlan hơdră, rơwang bruă rơđah, sit nik, ba glăi bôh tơhnal hloh. Yua kơ hrŏ trun rin rơpa ƀu kơnong kơ hmâo bôh tŭ yua ană mơnuih prong prin ôh mơ̆, ñu dô̆ jing sa amăng hơdôm phun than yôm phăn hloh, bơdjơ̆ nao ƀơi anăp pơhlôm mơ-ak klă, rơnuk rơnua, hơđong amăng đơ đam rŏng lŏn tơnah.

Ƀrô djơ̆ tal anai, Khua dêh čar ta ơi Phạm Minh Chính ăt lăng ƀuh rơđah mơn lu bôh than mơ̆ng Việt Nam kah hăng gru ba jơlan truh kih amăng hrŏ trun rin rơpa. Mơ̆ng sa bôh dêh čar rin rơpa, sô hơđăp, răm rai prong tơdơi giăm truh 40 thun blah ngă, 30 thun hmâo tơlơi kom guang dar, hăng jơlan pơplih phrâo, Việt Nam hmâo laih tơhnal hrŏ trun ƀun rin lu bơnah, nao hrŏm hăng pơsir anô̆ kơƀah gah ia jrao, pơtô pơhrăm, sang dô̆, ia hơdjă yua, anih anom dô̆. Kơnang kơ anun Việt Nam hmâo truh akô̆ tañ laih 10 thun amăng ngă tui hơdôm Tơhnal pơkă pơđĭ kyar Rơnuk thun mơ̆ng Sang gum hơbit djop dêh čar./.