Pơhiăp amăng mông jơnum, Khua dêh čar ta Phạm Minh Chính pơsit yôm hăng bơni hơdôm tơlơi gir run hăng bôh tơhnal dưi ngă mơ̆ng hơdôm gưl gơnong bruă, biă ñu bruă phun mơ̆ng Khul Kông ang mơnuih ƀôn sang, tơlơi gum hrŏm kơjăp mơ̆ng ding jum, gơnong bruă tơring čar, ƀôn prong; tơlơi gir rin, gum tơngan hrŏm ba glăi bôh tơhnal mơ̆ng anom bơwih ƀong bôh thâo măi mok; tơlơi ha pran jua, dŏng yua, gum hrŏm klă mơ̆ng mơnuih ƀôn sang, anom bơwih ƀong.

Pơ̆ anăp anai, Khua dêh čar lăi rơđah hơdôm ƀut bruă phun, amăng anun črâo rơđah bruă pok pơhai hơdôm bruă jao kiăng ječ mơ̆ng ră anai truh kơ Tết tui phiăn juăt Giáp Thìn 2024. Biă ñu, prăk pioh kơ tơlơi hơdip hơđong mơnuih mơnam, Khua dêh čar ta rơkâo Khua Jơnum min mơnuih ƀôn sang 12 bôh tơring čar ƀôn prong tañ pok pơhai pơsir prăk hơđong tơlơi hơdip mơda mơnuih mơnam tui jơlan ƀu yua prăk mơta. Khua dêh čar rơkâo, Ding jum tơlơi phiăn gum hrŏm hăng Ding jum kông ang pok pơhai pơpha hră čih anih anom anăn păn djơ̆ phiăn amăng VNeID ƀơi tơring čar Thừa Thiên Huế amăng 3 blan tal I thun 2024 kiăng ngă giong pơhư prong amăng đơ đam dêh čar./.