Bơkơtuai nao rai hăng Khua dêh čar ta Phạm Minh Chính, Ama wai lăng khul đăo Giuse Nguyễn Văn Phong ƀơi Sang jơnum Bắc Giang brơi thâo, amăng dua thun rơgao, ƀơi Bắc Giang anai klă mơn, mơnuih ƀôn sang lăi hrŏm, neh wa tui đăo khôp lăi ha jăn mơ-ak pran jua biă, yua kơ tơlơi hơdip mơda gơnam tam, pran jua dưi pơplih phrâo, biă ñu lĕ dưi čơkă Khua dêh čar nao hơ-ưč hmưi Hrơi Khua Yang tơkeng 2023.

Pơhiăp ƀơi anai Khua dêh čar Phạm Minh Chính lăi rơđah, Ping gah, Kơnuk kơna pơpŭ na nao tơlơi đăo gưt, tơlơi tui đăo mơ̆ng mơnuih ƀôn sang, amăng anun hmâo đăo khôp. Khua dêh čar ta lăi rơđah, Bắc Giang lĕ tơring čar bưp lu tơlơi tơnap amăng tal klin Covid-19 ngă, khă hnun hai, tơring čar hmâo pơgăn klă laih, hơkrŭ glăi hăng pơđĭ kyar tañ. Tơlơi čơkă Khua Yang tơkeng mơ̆ng khul đăo mơ-ak biă; čang rơmang gah yŭ tơlơi git gai mơ̆ng Ping gah, Kơnuk kơna, mơnuih ƀôn sang gir run ngă tui klă djop tơlơi pơtrun mơ̆ng Ping gah, hơdră bruă tơlơi phiăn mơ̆ng Kơnuk kơna. Khua dêh čar Phạm Minh Chính hơ-ưč hmưi neh wa Khul đăo Bắc Giang sa bơyan Noel suaih pral, yâo mơ-ak, sa Thun phrâo rơnuk rơnang./.