VOV4.Jarai - Tlam lơ 19/9, Khua dêh čar ơi Phạm Minh Chính hơmâo pơhiăp telephôn hăng Khua dêh čar Khač ơi Lý Khắc Cường. Dua čô khua dêh čar pơsit tơlơi yôm pơphăn amăng tơlơi rô nao rai Việt Nam - Khač hăng rim boh dêh čar, pơtŏng glăi hơdôm boh than ba glăi mơng tơlơi ngă hrŏm. Ngă hrŏm sĭ mơdrô hơmâo đĭ kyar kơjăp, bruă dun gơnam pơ amăng jang guai dêh čar hơmâo pơsir mơn. Tuh pơ plai mơng dêh čar Khač pơ Việt Nam đĭ tui na nao. Ngă hrŏm pơgang klin tŭ yua. Kơ hơdră ngă hrŏm amăng hrơi blan pơ anăp, dua čô Khua dêh čar kiăng bơbưp khua mua pơprong, pơtrut ngă hrŏm dlăm, klă, hơđong kơjăp; pơtrut bơbưp mơnuih ƀon sang.

Khua dêh čar ơi Phạm Minh Chính pơhiăp telephôn hăng Khua dêh čar Khač ơi Lý Khắc Cường.

Khua dêh čar ơi Phạm Minh Chính kiăng dua bơnah ngă hrŏm hơmâo prăk pơhrui mơng bruă sĭ mơdrô đĭ kyar hơđong, dưm kơnar; rơkâo dêh čar Khač ngă gal brơi kơ bruă nao rai sĭ mơdrô, blơi mut gơnam, biă ñu pok anih blơi gơnam mơng hmua mơng Việt Nam; rŭ glăi abih bang bruă mă ƀơi bah amăng guai dêh čar; djru brơi gơnam dưi ba sĭ amuñ ƀiă; ngă hrŏm, mă yua klă hơdôm tơlơi gêh gal hơmâo mơng hră pơkôl sĭ mơdrô rơngai.

Siu H’Mai: Pơblang