Khua dêh čar ta ơi Phạm Minh Chính rơkâo Gơnong bruă pơtô pơhrăm, hơdôm Ding jum, gơnong bruă dêh čar hăng hơdôm bôh tơring čar, ƀôn prong đing nao ngă tui 9 bruă phun, anun lĕ: Đing nao pơphun pok pơhai Klah čun mrô 91 mơ̆ng Ding jum kơđi čar tô̆ tui ngă tui Tơlơi pơtrun pơsit pơplih phrâo, pơđĭ dlông tŭ yua, bôh tơhnal bruă wai lăng kơnuk kơna amăng bruă Pơtô pơhrăm; Pơđĭ dlông anô̆ kơjăp nai pơtô čơđai, nai pơtô gưl dlông hăng mơnuih apăn bruă wai lăng pơtô pơhrăm, djơ̆ tui tơlơi kiăng sit hăng amăng rơwang pơplih phrâo Gơnong bruă pơtô pơhrăm; Kơsem min, pơsit abih bang kơ pơplih phrâo jơlan hơdră pơtô pơhrăm, hơdrôm hră hrăm phrâo; Ding jum pơtô pơhrăm hăng hơdôm bôh tơring čar, ƀôn prong prăp lui kơčăo bruă pơphun tal pơplông mă ƀăng gưl 3 thun 2025 tui Jơlan hơdră pơtô pơhrăm phrâo.

“Hlâo kơ thun hrăm phrâo 2024-2025, hơ-ơč hmưi abih bang khua apăn bruă wai lăng, nai pơtô čơđai ngă tui na nao pran jua gơgrong hăng hur har pran jua hăng bruă mă, pơsir djop tơlơi tơnap, yak rơgao djop tơlơi lông, gir kiăo tui tơhnal pơplih phrâo phun, akô̆ tlôn bruă pơtô pơhrăm, djơ̆ tui tơlơi čang rơmang mơ̆ng Ping gah, Kơnuk kơna hăng mơnuih ƀôn sang, ba djuai ania Việt Nam jing sa djuai ania thâo kơhnâo, kah hăng Khua mir sir Hồ Chí Minh kiăng khăp hmâo čang rơmang. Hơ-ơč hmưi thun hrăm phrâo 2024-2025 truh kih klă hiam; ƀing nai pơtô čơđai suaih pral, yâo mơ-ak, djru lu dong kơ bruă “pơtô pơhrăm”; čơđai sang hră, ƀing hrăm gưl dlông na nao jing ană siăng, čơđai rơgơi, ngă tui truh kih hơdôm tơlơi čang rơmang, tơlơi pơmin prong, djru pơdŏng plơi pla, lŏn ia jai hrơi jai pơdrŏng asah klă hiam”./.