Tal bưp anai pơphun lơ̆m Việt Nam-EU sit nik pơđĭ tui tơlơi ngă giăng mah bơnah ngă hrŏm hlom bom. Khua dêh čar lăi pơtong, EU hăng hơdôm dêh čar ngă ding kơna jing bơnah ngă hrŏm yom biă mă amăng bruă pơtom hiăp dêh čar Việt Nam; bruă akŏ pơjing tơlơi rô nao rai phrâo kiăng lăi anŏ đăo kơnang kơjăp bruă kơđi čar jai hrơi kơtăng hloh hăng ngă anŏ gêh găl pok pơhư prong bruă ngă hrŏm amăng djop bruă.

Lăng tom kơ tơlơi ngă giăng mah Việt Nam-EU, khua dêh čar mơak pran jua ƀơi anăp kơ tơlơi pơblih phrâo tơdơi kơ 35 thun akŏ pơjing bruă pơtom hiăp mơ̆ng thun 1990-2025. Bruă pok pơhai tŭ yua Hră kĭ pơkôl sĭ mơdrô rơngai plah wah Việt Nam-EU EVFTA hơmâo pơgôp hrŏm prong biă mă amăng bruă  ba EU jing bơnah ngă hrŏm prong hloh dong tal 4 mơ̆ng Việt Nbam, lơ̆m anun Việt Nam jing bơnah ngă hrŏm prong mơ̆n ƀơi EU mơ̆ng ASEAN. Bruă ngă hrŏm amăng ling tơhan, pơgang rơnuk ronua, pơgăn anŏ ngă pơblih ayuh hyiăng lŏn tơnah, bruă ngă hmua, tơlơi phiăn, boh thâo ia rơgơi, ayuh hyiăng anih dŏ jum dar…, ăt dưi pok pơhư prong mơ̆n. Khua dêh čar rơkâo, dua bơnah kơtưn ngă hrŏm tong ten hloh, pok pơhai ngă tui hră pơkôl EVFTA, pơtrut bruă sĭ mơdrô pok pơhư prong hăng bơkơnar, ngă gêh găl kơ bruă ĕp anih anom sĭ mơdrô kiăng pơgang boh tŭ tua lăp djơ̆ mơ̆ng anom bruă mơdrô dua bơnah.