VOV4.Jarai-Tlam lơ 28/9, Khua dêh čar ơi Phạm Minh Chính tŭ jum ơi Charles Kaye, Khua git gai Keh prăk tuh pơ alin ƀơi rŏng lŏn tơnah Warburg Pincus dêh čar Mi. Khua dêh čar lăng yôm bruă ngă hrom hlôm bôm kơplah Việt Nam hăng Mi ăt pơđĭ kyar na nao; bruă sĭ mơdrô dua bơnah djă hnong pơđĭ kyar klă, pơhrui glăi giăm 87 klai USD amăng akŏ 8 blan akŏ thun 2022, đĭ tui 20% pơkă hăng tal anai mơ̆n thun 2021. Dêh čar Mi ăt jing anih anom sĭ mơdrô prong hloh mơ̆ng Việt Nam, lơ̆m anun Việt Nam jing dêh čar sĭ mơdrô dong tal 9 mơ̆ng dêh čar Mi amăng rŏng lŏn tơnah hăng bơnah ngă hrom prong hloh ƀơi kual ASEAN.

Khua dêh čar tŭ jum Khua phun anom bruă keh prăk tuh pơ alin Warburg Pincus

Khua dêh čar rơkâo anom bruă keh prăk Warburg Pincus hăng mrô tuai ngă hrom prong, lu hloh amăng rŏng lŏn tơnah anai, ăt jing pô pơtruh brơi lu mơnuih sĭ mơdrô tuh pơ alin dêh čar lăi pha hăng dêh čar pơkŏn hnŭn mơ̆n rai tuh pơ alin pơ Việt Nam; laih dơ̆ng, ăt pok pơhư prong, pơđĭ kyar amăng lu bruă sĭ mơdrô phrâo, boh nik ñu amăng bruă mă pơkra apui lơtrik rơgoh pơđĭ kyar bruă tuh tia pơkra ming hăng apui lơtrik rơgoh laih anun djru pơgôp hiăp, lăi pơthâo brơi jơlan hơdră djơ̆ tơlơi phiăn kơ Việt Nam ngă hrom.

Nay Jek: Pơblang