VOV4.Jarai-Tlam lơ 11/10, Khua dêh čar ơi Phạm Minh Chính tŭ jum ơi Juan Ignacio Rubiolo, Kơ-iăng Khua Group anom bruă apui lơtrik AES dêh čar Mi. AES lĕ anom bruă apui lơtrik hơmâo anăn amăng 500 boh kông ty prong hloh dêh čar Mi yua kơ Hră pơhing phrâo Fortune ruah hăng sa amăng hơdôm boh kông ty ba akŏ hlâo amăng rŏng lŏn tơnah amăng bruă apui lơtrik. AES hơmâo lu bruă mă găn rơgao amăng bruă pơkra ming, pơkĕ yua apui lơtrik, man pơdong gong apui lơtrik hăng dăng hrĕ apui lơtrik bơwih brơi kơ bruă man pơdong amăng rŏng lŏn tơnah.

Ƀơi mông tŭ jum, Khua dêh čar ơi Phạm Minh Chính lăng yôm boh tơhnal bruă mă sĭ mơdrô, ăt kah hăng bruă ngă hrom, djru ba, lăi pơthâo jơlan hơdră man pơdong mơ̆ng Group AES ƀơi Việt Nam pơ anăp anai; biă mă ñu amăng bruă ba yua apui lơtrik pơgang mơtah mơda, rơgoh hơdjă lơ̆m pơblih mă yua apui lơtrik, ia jâo, kiăng hrŏ ƀiă carbon amăng thun 2050. Kơnuk kơna Việt Nam amra gum hrom djru, pơsir hơdôm tơlơi kiăng ngă lơ̆m tuh pơ alin ƀơi Việt Nam mơ̆ng Group AES kiăng ba glăi boh tŭ yua amăng bruă ngă hrom tuh pơ alin hơđong kjăp.

Nay Jek: Pơblang