Ƀơi mông jơnum boh thâo măi mok yôm Việt Nam - Hà Lan, ƀing khua bơkơtuai kơ lu tơlơi bơdjơ̆ nao hơdôm bruă kah hăng: Việt Nam yak đĭ glông hloh amăng bruă pơkra boh thâo măi mok yôm: tơlơi lăng mơ̆ng hơdôm anom bơwih ƀong rŏng lŏn tơnah; đĭ kyar hăng lăng ba mơnuih rơgơi pơčeh phrâo boh thâo măi mok yơyôm Việt Nam: hơdră ngă bruă hăng tơlơi kiăng ngă...Pơhiăp ƀơi anai, Khua dêh čar Hà Lan Mark Rutte brơi thâo, amăng tal rai čuă Việt Nam mơ̆ng ñu tal anai, hơmâo giăm 30 anom bơwih ƀong mă yua măi mok boh thâo yôm hloh mơ̆ng Hà Lan kiăo tui, lu kông ti boh thâo măi mok yôm mơ̆ng Hà Lan pơphun hơmâo lu kơčăo bruă tuh pơ alin, lu anom bơwih ƀong pơkŏn glăk hơduah ĕp hăng amra tuh pơ alin, ngă hrŏm ƀơi Việt Nam.

Pơhiăp ƀơi mông jơnum bơwih ƀong mơtah, Khua dêh čar ơi Phạm Minh Chính lăi, đĭ kyar mơtah hăng hơđong jing boh pơkhoă hăng jơlan nao khŏm kiăng mơ̆ng hơdôm boh dêh čar ƀơi rŏng lŏn anai. Khua dêh čar lăng yôm tơlơi gơgrong bruă nao hlâo mơ̆ng Khul pơlir hơbit kual Mi Kô̆ (EU) amăng bruă pơtrut bơwih ƀong abih bang mơtah hăng pơdar nao rai. Khua dêh čar kiăng hơdôm boh ding jum, anom bruă hăng abih bang anom bơwih ƀong Việt Nam hăng EU kiăng pơtrut tui dong hăng ngă rơđah hloh hơdôm tơlơi kĭ pơkôl kơplah wah dua bơnah; ƀuăn amra pơgang ba tơlơi dưi hăng tơlơi gêh gal mơ̆ng ƀing tuh pơ alin mơ̆ng čar rơngiao mah hơmâo bruă tơnap hơget tŭ mơn; lêng gum hrŏm hăng anom bơwih ƀong găn rơgao tơnap tap. Kiăo tui tơlơi gêh gal kiăng hơđong bruă mă, ngă bruă sui thun ƀơi Việt Nam hăng pran jua “Tơlơi klă ƀong hrŏm, tơlơi truh thâo djru nao rai”.