Tơdơi kơ jơnum čơkă jum mơtam, Khua ding jum ơi Tô Lâm hrŏm hăng khua ding jum tơhan pơlih dêh čar Nga bơkơtuai nao rai. Ơi Tô Lâm lăi, tơlơi rô nao rai ngă giăng mah plah wah Ding jum kông an Việt Nam hăng Ding jum tơhan pơlih dêh čar Nga hơmâo yak rơbat pơđĭ kyar hiam klă amăng djop bruă. Ƀơi mông jơnum bơkơtuai, dua bơnah tŭ ư pok pơhai tŭ yua “Hơdră ngă hrŏm plah wah dua ding jum kông an Việt Nam hăng Ding jum tơhan pơlih dêh čar Nga mơ̆ng thun 2022-2024 hơmâo kĭ amăng blan 5/2022; tŏ tui dơ̆ng pơčrong sai djru nao rai tơlơi pơhing ƀing soh sat, ĕp kơđi, pơsir kơđi ƀing soh sat đuăi nao rai ƀơi dua bơnah.

Dua bơnah kơsem min lăng bruă akŏ pơjing bruă ngă hrŏm pơgang ƀing ngă bruă sĭ mơdrô, ƀing čơđai sang hră anih prong hăng mơnuih ƀôn sang dua bơnah rô nao rai mă bruă, hrăm hră hăng bơwih ƀong huă ƀơi dua bơnah, kiăng pơgang ba tơlơi tŭ yua ăt kah hăng bruă pơhlôm pơgang bruă ngă soh sat, pơgăn ƀing ngă soh tơlơi phiăn, an pơhŭi kơ tơlơi rơnuk rơnua dêh čar Việt Nam hăng Nga.