Amăng mông mă bruă, Khua ding jum man pơdong Trần Hồng Minh pơsit hăng tơring čar kơ bruă pơplih tuh pơ alin man pơkra jơlan rơdêh đuăi hmar Nha Trang-Liêng Khương hơdai nao rơwang thun 2026-2030; jao glăi pô wai lăng akŏ bruă brơi tơring čar Khánh Hòa. Hăng akŏ bruă jơlan rơdêh đuăi hmar Kơdư-Dơnung gah yŭ, ară jơlan Pleiku-Buôn Ma Thuột-Gia Nghĩa, jao brơi tơring čar Dak Lak lĕ pô wai lăng. Hăng bruă tuh pơ alin pơkra ming jơlan mrô 27, ba pơmut amăng ring bruă tuh pơ alin man pơdong amăng tơring čar hăng rơkâo ngăn drăp djru brơi mơng gơnong glông.

Kiăng kơtưn tơkuh nao rai kiăng pơtrut pơđĭ kyar bơwih ƀong huă-mơnuih mơnam amăng tơring čar Lâm Đông, Khua ding jum man pơdong Trần Hồng Minh rơkâo pơtrut tañ man pơkra hơdôm ară jơlan rơdêh đuăi hmar phun anun lĕ Bảo Lộc-Liên Khương; Tân Phú (Đồng Nai)-Bảo Lộc (Lâm Đồng); jơlan rơdêh đuăi hmar Kơdư-Dơnung gah yŭ, ară jơlan Gia Nghĩa-Chơn Thành; đing nao tuh pơ alin pơkra ming 3 tơdrun kompăn glăk hơmâo amăng tơring čar. Kơ tơdron rơdêh por, hăng hơdôm akŏ bruă pơkra ming tơdron rơdêh por Liên Khương hăng abih tih prăk tuh pơ alin rơbêh 1.000 klai prăk pok pơhai mơng blan 3 truh blan 9 pơ anăp hăng tơdron rơdêh por Phan Thiết.