Kiăng pok pơhai tŭ yua bruă jao amăng thun hrăm 2023-2024, Khua ding jum ơi Nguyễn Kim Sơn rơkâo tơring čar Dak Nông đing nao git gai hăng ngă tui klă sa, dua hơdră bruă anun lĕ: đing nao, tuh pơ alin lu ƀiă dong brơi kual ataih, asuek, kual mơnuih djuai ania ƀiă; pơphun ĕp pơmut ƀing nai pơtô kiăng pơhlôm brơi djop tui mrô pơkă; ngă tui lăp djơ̆, dưm dăp, pơpha ƀing nai pơtô brơi kơ djop mơta, ha amăng plĕ tui tơlơi pơkă; pơhlôm brơi anih pơtô hrăm, gơnam tam yua ƀơi sang hră; pơtrut gum hrŏm amăng abih bang amăng pơtô hrăm; mă yua klă mơnuih pơlir hăng pơtrut pơplih phrâo, mă yua hăng pơđĭ kyar kơtang amăng boh thâo ia rơgơi; đing nao ngă tui tŭ yua bruă pok pơhai jơlan hơdră pơtô pơjuăt phrâo djơ̆ hăng hrơi mông pơkă:

“Thun hrăm pơ anăp lĕ thun hrăm yôm phăn amăng jơlan hơdră pơplih phrâo amăng pơtô hrăm. Bruă mă lu ƀiă pơhmu hăng hơdôm thun hlâo anun, yua anun khŏm đing nao ƀiă dong, gir run hloh dong. Kiăng anăp nao tơlơi dưi truh rơnuč amăng thun 2025 pơgiong abih bruă pơplih tui jơlan hơdră pơtô hrăm phrâo hăng prap lui djop mơta kiăng pok pơhai jơlan hơdră pơtô hrăm phrâo hăng sang hră čơđai anet”.

Ƀrô tal pel ĕp prap lui thun hrăm phrâo, Khua ding jum pơtô pơjuăt Nguyễn Kim Sơn hơmâo nao čuă, pơ alum pran jua, ƀơi 2 boh tivi, 100 boh rơdêh dang wang brơi kơ ƀing nai, čơđai sang hră gưl dua Hoàng Văn Thụ hăng sang hră gưl sa Nơ Trang Lơng, să kual ataih Quảng Sơn, tơring glông Dak Glong.