Lơ 23/10, ƀơi Ƀirô mă bruă Ping gah dêh čar ta, Ding jum kơđi čar, Grŭp git gai Ping gah pơphun jơnum đơ đam dêh čar pơkĕ hrom hăng lăng nao rai mơng ataih lăi pơthâo hăng pok pơhai Tơlơi pơtrun pơsit 24 mơng Ding jum kơđi čar tal 13 kơ pơđĭ kyar bơwih ƀong mơnuih mơnam, pơhlôm pơgang lŏn ia rơnuk rơnua plơi pla ƀơi kual Ngŏ Dơnung dêh čar truh thun 2030 tơhnal lăng truh thun 2045.

Khua git gai Ping gah dêh čar ơi Nguyễn Phú Trọng git gai hăng hmâo tơlơi pơhiăp črâo ba yôm phăn amăng mông jơnum. Kual Ngŏ Dơnung dêh čar amăng anun hmâo ƀôn prong Hồ Chí Minh hăng 5 bôh tơring čar gah dêh čar: Tây Ninh, Bình Phước, Bình Dương, Đồng Nai, Bà Rịa - Vũng Tàu. Hăng kual hmâo anih anom, bruă mă yôm phăn amăng pơđĭ kyar bơwih ƀong – mơnuih mơnam, pơhlôm pơgang lŏn ia, rơnuk rơnua plơi pla hăng pơtom hiăp mơng lŏn ia. Pơhiăp črâo ba amăng mông Jơnum, Khua git gai Ping gah dêh čar ta ơi Nguyễn Phú Trọng đăo gơnang lĕ: Gưl Ping gah, gong gai hăng mơnuih ƀôn sang hơdôm bôh tơring čar amăng kual Ngŏ Dơnung dêh čar sit ñu amra ngă tui pran kơtang hloh dong tơlơi găn rơgao pơplih phrâo, phiăn juăt ngă hơkrŭ, sông kơtang ư-ang hăng pran jua yôm phăn, klă hiam hloh, hur har, pơčeh phrâo, thâo lăng nao rai mơng mơnuih kual Ngŏ; hrom hăng hơdôm grŭp, ding jum, gơnong bruă dêh čar hăng gưl Ping gah, gong gai hơdôm gưl amăng đơ đam dêh čar, gir run hrưn đĭ kơtang hloh dong, pơsit pran jua ngă tui truh kih Tơlơi pơtrun pơsit mơng Ding jum kơđi čar tal anai, pơjing yak pơplih phrâo, hmâo tơhnal pơplih pha ra amăng bruă pơđĭ kyar bơwih ƀong – mơnuih mơnam hăng pơhlôm pơgang lŏn ia – rơnuk rơnua ƀơi kual Ngŏ Dơnung dêh čar./.