Mơguah lơ 20/10, ƀơi Sang mă bruă Khua pơ ala mơnuih ƀôn sang dêh čar ta pơphun ngă lơphet pok phun Tal jơnum lok 4, Khua pơ ala mơnuih ƀôn sang dêh čar ta tal 15 gah yŭ tơlơi git gai mơng Khua git gai wai lăng pơ ala mơnuih ƀôn sang dêh čar ta ơi Vương Đình Huệ.

Pơkă hlâo amăng 21 hrơi mă bruă, Khua pơ ala mơnuih ƀôn sang amra pel ĕp, gum pơhiăp hăng pơsit lu bôh yôm phăn bơdjơ̆ nao bơwih ƀong – mơnuih mơnam hăng ngăn drăp kơnuk kơna; pel ĕp, lăng glăi 07 rơwang bruă tơlơi phiăn, 03 hră čih pơkra tơlơi pơtrun pơsit hmâo tom rơwang pơkă tơlơi phiăn; bơkơtuai, gum pơhiăp kơ 07 rơwang bruă tơlơi phiăn pơkon.

Pơhiăp amăng mông pok phun, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi pơsit, gah yŭ tơlơi git gai djơ̆, kơjăp, hmao tlôn mơng Ping gah hăng Kơnuk kơna; hơdră pơsit djơ̆, gơgrong hlâo hăng lăng tui ba glăi bôh tơhnal mơng Khua pơ ala mơnuih ƀôn sang; tơlơi črâo ba, git gai djơ̆, khut khăt mơng Gong gai dêh čar, Khua dêh čar ta; tơlơi gum hrom hơbit, gum hrom kơjăp mơng hơdôm gưl, hơdôm gơnong bruă. Tơlơi lŏn ia amăng 9 blan thun 2022 dưi hmâo hơdôm bôh tơhnal klă, hmâo lu gru pơđom pioh rơđah. Đĭ kyar GDP 9 blan hmâo 8,83% lu hloh yap mơng thun 2011 truh ră anai; hơdôm kual mơng bruă bơwih ƀong leng kơ hmâo rơnoh hơkrŭ glăi hăng đĭ kyar prong./.