Amăng jang jar kmar giang mah pơdong amăng jơlan dêh čar mrô 1A, ataih mơng plơi prong Lạng Sơn 17 km đuăi nao gah kơdư, ataih mơng Hà Nội 171 km đuăi nao gah ngŏ kơdư. Ƀơi anai pok kiăng sĭ mơdrô gơnam tam kơplah wah Việt Nam hăng Khač. Ƀơi amăng jang jar kmar giang mah hơmâo gong guai 1116 hlă hla kơ dêh čar Cộng hoà xã hội chủ nghĩa Việt Nam hing ang, anai lĕ akŏ jơlan dêh čar mrô 1A đuăi mơng Lạng Sơn nao pơ Cà Mau. Amăng jang jar kmar giang mah lĕ anih akŏ phun kơ glông bơwih ƀong huă, pơgôp pơtrut pơđĭ kyar bơwih ƀong huă kơplah wah Việt Nam hăng Khač hrŏm hăng hơdôm boh dêh čar kual ASEAN.

Ară jơlan anai hơmâo: Nam Ninh-Lạng Sơn-Hà Nội-Hải Phòng tui tơlơi pơkôl kơplah wah khua mua dua boh dêh čar. Ƀơi anai Khua git gai Ping gah dêh čar ơi Nguyễn Phú Trọng hơmâo tơña blan hăng ƀơk gơnam brơi ling tơhan mă bruă ƀơi amăng jang. Ƀrô tal anai, Khua git gai Ping gah dêh čar ơi Nguyễn Phú Trọng hơmâo mông hiăp bit hăng Khua anih jưh pơ ala dêh čar Khač ƀơi Việt Nam Hùng Ba. Khua git gai Ping gah ơi Nguyễn Phú Trọng rơkâo, tơring čar Lạng Sơn hăng anom bruă bơdjơ̆ nao ƀơi amăng jang jar kmar giang mah tŏ tui gum pơgôp lu ƀiă dong, pơgôp pơtrut tơlơi rô nao rai ngă hrŏm Việt Nam-Khač jai hrơi pơđĭ kyar. Hlâo anun, yang hrơi tlam lơ 25/8, Khua git gai Ping gah ơi Nguyễn Phú Trọng hrŏm hăng grup hyu mă bruă hơmâo ƀơk gơnam brơi sang anŏ ơi Nguyễn Xuân Khoát, mơnuih djru hơkrŭ hăng sang anŏ yă Bạch Thị Khôi , mơnuih djru tơgŭ hơkrŭ ƀơi plơi prong Lạng Sơn.