VOV4.Jarai - Tlam lơ 17/10, ƀơi Ƀirô Ping gah, Khua git gai Ping gah dêh čar ơi Nguyễn Phú Trọng tŭ jum Khua mir sir Singapore Halimah Yacob hăng ƀing khua mua mơng Singapore ƀrô tal rai čuă sit nik gưl Kơnuk kơna pơ dêh čar Việt Nam. Amăng mông bưp, Khua git gai Ping gah dêh čar ơi Nguyễn Phú Trọng pơsit tong Việt Nam lăng yôm biă mă tơlơi rô nao rai ngă hrŏm hăng dêh čar Singapore, rơkâo dua bơnah djă pioh, ngă tui boh tŭ yua yôm amăng ngă hrŏm hluai tui bruă kơtưn pơlăi nao rai, pơbưp nao rai khua mua hăng djop gưl mơng Ping gah, Kơnuk kơna, Khua pơ ala mơnuih ƀon sang dêh čar hăng mơnuih ƀon lan; hrưn đĭ tŭ yua amăng ngă hrŏm sĭ mơdrô, tuh pơ alin, ngă gêh gal kiăng hơkrŭ glăi bơwih ƀong huă tơdơi kơ abih klin.

Khua git gai Ping gah dêh čar ơi Nguyễn Phú Trọng tŭ jum khua mir sir Singapore

Khua git gai Ping gah dêh čar ơi Nguyễn Phú Trọng jao hơdôm anom bruă bơdjơ̆ nao mơng Việt Nam gum hrŏm kjăp hăng hơdôm anom bruă ƀơi Singapore kiăng ngă tui hơdôm tơlơi pơkôl hơmâo kĭ lơ̆m Khua mir sir rai čuă, yua tơlơi dưi kơ mơnuih ƀon sang dua bơnah.

VOV/Siu Đoan: Pơblang