Mơng hrơi hơbô̆ bruă pok pơhai lơ 1/7/2024 truh ră anai, đơ đam dêh čar hơmâo akŏ pơjing rơbêh 86 rơbâo grup wai pơgang rơnuk rơnua, hơđong hăng rơbêh 276 rơbâo čô ding kơna. Khul mơnuih anai hơmâo lăi pơthâo brơi kông ang să rơbêh 141 rơbâo tơlơi pơhing, djru pơsir hĭ rơbêh 90 rơbâo bruă, pơgôp wai pơgang hơđong amăng ƀon lan. Amăng mông bưp, Khua git gai Ping gah lăng yôm boh than dưi ngă pơprong mơ̆ ƀing pô anai dưi ngă, laih dong pơlăi nao rai hơdôm tơlơi tơnap tap, glêh glar mơng ƀing mơnuih djru bruă phun ƀơi ƀon lan.

Khua git gai Ping gah dêh čar pơsit tong Ping gah, kơnuk kơna amra tŏ tui pơgiong tơhnal pơkă, hơdră bruă kiăng khul mơnuih anai jing ƀing tơhan yôm phun wai pơhang rơnuk rơnua, hơđong. Pơ anăp anai, Khua git gai Ping gah rơkâo djop ding jum, gơnong bruă, gong gai ƀon lan pơtrut kơtang pơtô pơblang, ngă mut hrŏm mơnuih mơnam, đing nao djru pơjing mơnuih djru brơi hơđong kjăp.