Pơhiăp git gai amăng mông jơnum, Khua git gai Ping gah dêh čar ơi Tô Lâm pơtŏng sit, bôh thâo phrâo măi mok jing pran pơtrut phun amăng pơđĭ kyar bơwih ƀong mơnuih mơnam mơ̆ng lu dêh čar ƀơi rŏng lŏn tơnah djru pơđĭ rơnoh bruă mă hăng pran bơkơtưn mơ̆ng lŏn ia. Yua anun, hăng tơhnal pơkă jing dêh čar măi mok phrâo amăng thun 2030 hăng dêh čar pơđĭ kyar, pơhrui glăi lu prăk amăng thun 2045, đơ đam dêh čar khom lăng bôh thâo phrâo, hơdră mă yua măi mok, pơplih phrâo hăng pơplih mrô lĕ pran pơtrut phun.

Bơ̆ bruă jao mơ̆ng abih bang glông bruă kơđi čar pơ̆ anăp anai, Khua git gai Ping gah dêh čar rơkâo, kiăng ba Tơlơi pơtrun pơsit mut amăng tơlơi hơdip mơda ba glăi bôh tơhnal hăng hmao tlôn; hơdôm gưl, hơdôm gơnong bruă, hơdôm tơring čar, ƀôn prong khom gum tơngan hrom mă bruă, ƀu dưi ngă kaih. Khua git gai Ping gah dêh čar rơkâo, tañ ngă giong hơdră pơkă, hơdră bruă amăng thun 2025, jai tañ jai klă khom ngă giong bruă pơplih pơkra pơhrua nao ƀudah mă yua phrâo hơdôm tơlơi pơkă amăng tơlơi phiăn, pơkă hơdră bruă, pơtlaih abih hơdôm anô̆ ngă gun, pơnăng pơgang pioh pơđĭ kyar bôh thâo phrâo, hơdră mă yua măi mok, pơplih phrâo pơčeh phrâo hăng pơplih mrô, mă yua  đut hlah pran pơčeh phrâo, pơtrut pơsur khin pơmin, khin ngă, khin gơgrong./.