Tơdơi kơ hmư̆ hră lăi pơthâo mơng Ding jum sĭ mơdrô hăng tuh tia pơkra ming hăng hơdôm tơlơi pơgôp hiăp mơng ƀing khua mua nao jơnum, Khua git gai Ping gah dêh čar rơkâo Ding jum sĭ mơdrô hăng tuh tia pơkra ming tŏ tui kơsem min, tŭ mă djop tơlơi pơgôp hiăp amăng mông jơnum, ječ ameč pel ĕp hăng lăi pơthâo Ding jum kơđi čar, Khul apăn bruă Ping gah hơdôm bruă aka ƀu klă amăng tơlơi rô nao rai bơwih ƀong huă-sĭ mơdrô kơplah wah dêh čar ta hăng bơnah ngă hrŏm akŏ phun hăng tơbiă hơdră pơsir hĭ.

Kơ jơlan gah pơđĭ kyar tơlơi rô nao rai bơwih ƀong huă-sĭ mơdrô kơplah wah dêh čar ta hăng bơnah ngă hrŏm pơ anăp, Khua git gai Ping gah lăi pơtong, tơlơi črâo trun mơng Ping gah, Kơnuk kơna Việt Nam lĕ kjăp tui jơlan pơtom hiăp rơngai, ngă pô yua kơ tơlơi rơnuk rơnua, giang mah, ngă hrŏm hăng pơđĭ kyar, djop mơta, djop bơnah amăng tơlơi rô nao rai jar kmar, pơhlôm djơ̆ tơlơi pơkă ba glăi tơlơi dưi kơ lŏn ia, djuai ania lĕ tơlơi yôm hloh.