Amăng hơdôm hrơi nao čuă, khua git gai Ping gah dêh čar ơi Tô Lâm amra git gai hrŏm mông pơbưp khua mua pơprong kơplah wah Ping gah Cộng sản Việt Nam hăng Ping gah mơnuih ƀôn sang ngă hơkrŭ Lao dong mơng lơ 1-2/12/2025, tui tơlơi jak iâu mơng Khua git gai Ping gah mơnuih ƀôn sang ngă hơkrŭ Lao, Khua mir sir dêh čar Lao ơi Thongloun Sisoulith hăng bơnai ñu. Tal nao čuă mơng Khua git gai Ping gah tal anai amra jing tơlơi pơtrut phrâo amăng ngă hrŏm yôm phăn kơplah dua boh dêh čar amăng djop mơta bruă. Anai lĕ sa amăng hơdôm bruă pơtom hiăp yôm phăn mơng Việt nam amăng thun anai hăng tal nao čuă gưl kơnuk kơna blung a pơ Lao mơng Khua git gai Ping gah dêh čar ơi Tô Lâm lơm đĭ ngă khua git gai Ping gah.

Tal nao čuă anai ƀu djơ̆ kơnong pơdah hơdră bruă hlâo tơdơi ăt sa mơng Việt Nam lêng kơ đing nao hloh brơi tơlơi rô nao rai giang mah hing ang, gum pơgôp yôm phăn, ngă hrŏm djop mơta hăng Lao đôč ôh mơ̆ ăt pơsit tong tơlơi gir run mơng Việt Nam hrŏm hăng Lao pơjing tơlơi anăp nao phrâo, ba tơlơi rô nao rai dua bơnah dêh čar đĭ prong ƀiă hăng tơlơi đăo gơnang kơđi čar prong ƀiă, ba glăi tơlơi pơtrut phrâo hăng pơtrut pơđĭ kyar sit nik hơđong kjăp tơlơi rô nao rai dua bơnah amăng rơwang phrâo.