Mơguah lơ 13/10, ƀơi plơi prong jưh jom Hà Nội, Jơnum khua mua Ping gah kơnuk kơna tal I, rơwang thun 2025-2030 sit nik pơphun. Khua git gai Ping gah dêh čar ơi Tô Lâm nao jơnum hăng đĭ pơhiăp amăng mông jơnum. Pơ ala brơi Ding jum kơđi čar, Khua git gai Ping gah, Khua git gai Ping gah dêh čar lăng yôm hơdôm boh than dưi ngă prong mơng Ping gah Kơnuk kơna dưi ngă amăng rơwang thun 2020-2025, sit biă ñu amăng bruă git gai, črâo ba bruă pơjing hơdră bruă, pơđĭ kyar bơwih ƀong huă-mơnuih mơnam, pơgang klin kman hăng hơđong tơlơi hơdip mơnuih ƀôn sang.

Khua git gai Ping gah lăi pơtong, Ping gah Kơnuk kơna kiăng tŏ tui ba gru amăng bruă kơđi čar, thâo rơgơi, ngă klă amăng bruă mă hăng pơplih pơčeh phrâo; anai lĕ anih pơdah pran gum pơgôp, mut hrŏm amăng tơlơi pơmĭn hăng bruă mă amăng djop anih anom mă bruă kơnuk kơna. Ñu rơkâo pơjing Ping gah mă bruă tơpă sit, hơđong kjăp; khut khăt pơgăn hưp ƀong kông ngăn, yua gơnam khưi khai, ngă soh; tŏ tui pran gơgrong mơng Kơnuk kơna “črâo ba pơđĭ kyar, hơdip tơpă, ngă bruă hăng djru brơi mơnuih ƀôn sang”.

Pơhiăp ƀơi mông jơnum blung a Jơnum ruah khua ping gah Kơnuk kơna tal Sa, Khua ping gah Kơnuk kơna, Khua dêh čar ơi Phạm Minh Chính lăi, Jơnum anai jing bruă kơđi čar yom bia mă, kơđŏm gru pơplih phrâo amăng bruă akŏ pơdong Kơnuk kơna mă bruă tơpă sit, pơplih phrâo, ngă bruă, yua kơ lŏn ia, yua kơ mơnuih ƀôn sang. Jơnum anai kiăng truh thun 2030, Việt Nam jing sa boh dêh čar glăk đĭ kyar hơmâo sang măi boh thâo ia rơgơi phrâo, prăk pơhrui glăi lu mơn, dong amăng grup 30 boh dêh čar hơmâo GDP prong hloh rŏng lŏn tơnah. Pơđĭ kyar bơwih ƀong huă thun 2026-2030 khŏm tañ, hơđong, pơhlôm  dưm kơnar djŏp mơta.

Jơnum ba tơbiă 10 bruă mă, hơdră pơsir yom phun, pơƀut čih pơkra giong tơlơi phiăn, ngă brơi bruă pơkra gơnam amuñ hloh, gêh gal hloh,  iâu pơthưr abih bang tơlơi gêh gal, pơtrut pơđĭ kyar; pơtrut mă yua boh thâo măi mok phrâo, djŏp mơta leng kơ phrâo soh; lăng boh thâo ia rơgơi, thâo pơčeh rơgơi hăng pơplih boh thâo mrô jing phun atur či kơdăt đĭ pơ anăp; akŏ pơjing bruă pơtô hrăm phrâo mơn, mơnuih mă bruă rơgơi mơn.