Pơđut mông jơnum, Khua git gai Ping gah dêh čar ơi Tô Lâm lăng yôm 5 boh than ba glăi yôm phăn mơng tơhan kông ang dưi ngă amăng hrơi blan rơgao hăng hơdôm bruă mă klă, pơčeh phrâo, djơ̆ tơlơi sit nik amăng pok pơhai tơlơi črâo trun mơng Ping gah, kơnuk kơna kơ bruă djru mơnuih mơnam anun lĕ: gơgrong nao čih anăn, ngă tui bruă jao man pơdong 15 boh sang hră ƀơi hơdôm boh tơring čar kual čư̆ siăng, să giăm guai, kơsem min, man pơdong 3 boh sang hră kơnuk kơna čem rông ba ƀing čơđai tơnap tap, ƀing čơđai djuai ania ƀiă, djru brơi Điện Biên dăng hyu hrĕ apui lơtrik amăng hơdôm boh plơi pla djuai ania Mông.

Lăi nao jơlan gah bruă jao pơ anăp anai, Khua git gai Ping gah dêh čar ơi Tô Lâm rơkâo, Ping gah kông ang gơnong glông hăng Ding jum kông ang kiăng mut hrŏm tơlơi pơmĭn tui tơlơi rơkâo prong wai pơgang Ping gah, wai pơgang kơnuk kơna, pơhlôm hơđong lŏn ia amăng rơwang ngă hơkrŭ phrâo, anăm brơi lŏn ia ta sư̆ rơbư̆, kơtuă ƀơi anăp hơdôm tơlơi pơplih.