Đĭ pơhiăp amăng mông pơdah rup ƀơi Cao Bằng, Khua git gai Ping gah dêh čar ơi Tô Lâm pơsi tong, bruă Wa Hô glăi pơ dêh čar ƀu djơ̆ kơnong tơlơi pơwot glăi pơ plơi pla lŏn ia đôč ôh mơ̆ ăt lĕ glăi pơ mơnuih ƀôn sang, glăi lăng tơlơi sit nik lŏn ia, hăng jơlan rơngai, ngă pô mơng bruă ngă hơkrŭ ƀơi Việt Nam. Mơng hơdôm tơlơi pơsit yôm phăn hơmâo pơjing rai ƀơi kual čư̆ siăng Cao Bằng, jơlan ngă hơkrŭ ƀơi Việt Nam hơmâo pơsit tong, ba truh tơlơi dưi amăng bruă ngă hơkrŭ blan 8 thun 1945, akŏ pơjing Kơnuk kơna Việt Nam mơng mơnuih ƀôn sang, yua mơnuih ƀôn sang hăng kơ mơnuih ƀôn sang.

Tơlơi yôm hloh mơng bruă Wa Hô pơwot glăi pơ dêh čar ƀu djơ̆ kơnong dong amăng gru grua hing ang đôč ôh mơ̆ ăt lĕ hơdôm tơlơi pơhrăm glăi yôm dŏ djă pioh na nao. Ƀơi anăp rup trah Khua mir sir Hồ Chí Minh kiăng khăp, ƀing ta ƀuăn amra gum pơgôp ha pran, gir run kiăo tui jơlan hơmâo ruah; tŏ tui glông jơlan mơ̆ wa hơmâo ruah, ngă bruă khut khăt, ngă bruă tŭ yua, rĭm gưl, rĭm gơnong bruă, rĭm čô mơnuih apăn bruă, mơnuih Ping gah gơgrong ƀơi anăp mơnuih ƀôn sang, gir run akŏ pơjing lŏn ia Việt Nam rơnuk rơnua, rơngai, ngă pô, prong kơtang hăng pơdrong sah, pơgôp amăng bruă pơgang rơnuk rơnua hăng pơđĭ kyar amăng kual hăng rŏng lŏn tơnah.