Amăng hơdôm hrơi nao čuă, Khua git gai Ping gah dêh čar ơi Tô Lâm hơmâo mông bơkơtuai hăng Khua git gai Ping gah, Khua mir sir dêh čar Lao ơi Thongloun Sisoulith; bưp Khua dêh čar Sonexay Siphandone, Khua git gai pơ ala mơnuih ƀôn sang dêh čar Saysomphone Phomvihane; nao čuă ƀing khua mua hơđăp dêh čar Lao; nao ngă lơphet hơdor glăi 50 thun akŏ pơjing kơnuk kơna; dưm guang bơnga ƀơi Gong kut pioh hơdor tơhan djai aka hơmâo anăn; đĭ pơhiăp kơ hơdră bruă ƀơi Sang hră pơtô bruă kơđi čar hăng ngă bruă čar dêh čar Lao; nao ngă lơphet pok đang bơnga giang mah Lao-Việt Nam hăng sa, dua bruă pơkŏn dong; laih dong git gai mông bưp khua mua pơprong kơplah wah Ping gah Cộng sản Việt Nam hăng Ping gah mơnuih ƀôn sang ngă hơkrŭ dêh čar Lao.

Ƀrô tal nao čuă, dua bơnah hơmâo kĭ sa, dua hră pơ-ar ngă hrŏm yôm phăn, pơhlôm gêh gal djơ̆ tơlơi phiăn, pok rai hơdôm tơlơi yak nao ngă hrŏm phrâo, lăp djơ̆ tơlơi rơkâo pơđĭ kyar mơng rĭm boh dêh čar hăng tơlơi dưi hrŏm mơng dua djuai ania, tŏ tui ngă dơlăm ƀiă dong tơlơi rô nao rai Việt Nam-Lao amăng rơnuk phrâo.