Amăng mông bưp, Khua git gai Ping gah dêh čar ơi Tô Lâm lăng yôm boh than mơng mông jơnum bơkơtuai kơplah wah Khua ding jum ơi Pete Hegseth hăng Khua ding jum ling tơhan dêh čar Việt Nam ơi Phan Văn Giang, pơsit tong bruă ngă hrŏm gah ling tơhan kơplah wah dua boh dêh čar hơmâo hăng glăk jing sa amăng hơdôm bruă akŏ phun amăng tơlơi rô nao rai dua bơnah. Khua git gai Ping gah čang rơmang dua bơnah tŏ tui pơtrut ngă hrŏm bruă ling tơhan brơi sit nik, hluai tui bruă pơpŭ tơlơi rơngai, ngă pô, rơnuk rơnua lŏn ia, hơdôm tơlơi pơkă pơtom hiăp hăng ling tơhan mơng Việt Nam, pơgôp kơtưn pran đăo gơnang yôm phăn hăng pơhlôm rơnuk rơnua, hơđong amăng kual.

Dua bơnah bơtŭ ư hrŏm, bruă tŏ tui pơbưp nao rai khua mua hăng pơtom hiăp na nao kơplah wah anom bruă dua bơnah, sit biă ñu kơplah wah Ding jum ling tơhan dêh čar Việt Nam hăng Ding jum blah ngă dêh čar Mi, tơlơi anai yôm phăn biă mă amăng bruă hơkrŭ pran đăo gơnang hăng ngă dơlăm tui tơlơi rô nao rai ngă hrŏm djop mơta Việt Nam-Mi, pơgôp amăng pơhlôm rơnuk rơnua, hơđong, ngă hrŏm hăng pơđĭ kyar amăng kual hăng rŏng lŏn tơnah.