Lơ 20/3, ƀơi Ƀirô Ping gah, Khua git gai Ping gah dêh čar ơi Tô Lâm tŭ jum Khua pơ ala mơnuih ƀôn sang gơnong glông dêh čar Mi Steven David Daines. Amăng mông bưp, Khua git gai Ping gah dêh čar ơi Tô Lâm hok mơ-ak čơkă Khua pơ ala mơnuih ƀôn sang gơnong glông Steven Daines tal blung a rai čuă dêh čar Việt Nam, brơi thâo tal rai čuă anai yôm phăn biă mă, pơgôp pơtrut tơlơi rô nao rai Việt Nam-Mi pơđĭ kyar hiam klă. Khua git gai Ping gah dêh čar pơsit tong dêh čar Mi lĕ sa amăng hơdôm boh dêh čar ngă hrŏm prong hloh mơng Việt Nam, hok mơ-ak lơm dêh čar Mi tŏ tui kơtưn ngă hrŏm hăng dêh čar Việt Nam, dong yua Việt Nam “kơtang, rơngai, gơgrong mă, pơdrong asah”.

Khua git gai Ping gah dêh čar lăi nao sa, dua jơlan gah kiăng ngă tui tơlơi gal amăng tơlơi rô nao rai kơplah wah dua boh dêh čar pơ anăp anai, anun lĕ: bơwih ƀong huă, sĭ mơdrô hăng tuh pơ alin kiăng tŏ tui lĕ tơlơi akŏ phun amăng tơlơi rô nao rai dua bơnah, tŏ tui pơsir hĭ bruă dŏ glăi mơng rơnuk blah wang, pok prong hăng kơtưn ngă hrŏm amăng djop mơta bruă hăng dêh čar Mi hơmâo tơlơi dưi prong hăng Việt Nam glăk kiăng anun lĕ: boh thâo măi mok, pơplih pơčeh phrâo, apui lơtrik, ia jrao, ngă hmua.