Amăng mông bưp, khua git gai Ping gah dêh čar ơi Tô Lâm pơsit tong Việt Nam lêng kơ lăng yôm hăng đing nao biă mă bruă hơkrŭ hăng kơtưn tơlơi rô nao rai gum pơgôp yôm phăn Việt Nam-Lao, lăng anai lĕ bruă jao yôm phăn hăng bruă pơđĭ kyar ƀơi rĭm boh dêh čar; pơsit tong Việt Nam hlâo tơdơi lêng kơ dong yua dêh čar Lao pơđĭ kyar, amra pơlăi nao rai tơlơi găn rơgao hăng dêh čar Lao amăng djop mơta bruă, dua boh dêh čar Việt Nam-Lao amra apăn tơngan kjăp yak nao pơđĭ kyar hrŏm.

Khua git gai Ping gah dêh čar rơkâo pơ anăp Ding jum kông ang dua bơnah kiăng tŏ tui gru grua hiam klă, kơtưn djru tơdruă, gum hrŏm kjăp, pơlăi nao rai tơlơi pơhing, tơlơi găn rơgao amăng bruă mă, thâo rơđah tơlơi sit nik, gum hrŏm pơgang, pơgăn hơdôm bruă ngă soh; ngă hrŏm kjăp amăng pơgăn bruă pơčut pơčao, bruă ngă rung răng, pơgăn ƀing ngă soh găn nao rai djop dêh čar.