Tô̆ tui tal nao čuă sit nik dêh čar Khač, mơguah lơ 1/11, Khua git gai Ping gah dêh čar ta ơi Nguyễn Phú Trọng hmâo bơkơtuai hăng Khua dêh čar Khač ơi Lý Khắc Cường. Khua git gai Ping gah dêh čar ta ơi Nguyễn Phú Trọng lăi lĕ, Việt Nam hăng Khač lĕ dua bôh dêh čar jê̆ giăm ha mơguai, hmâo phiăn juăt giăng mah sui thun, hmâo lu tơlơi hơhrŭp gah bruă kơđi čar hăng jơlan gah pơđĭ kyar. Dua Ping gah, dua dêh čar hăng mơnuih ƀôn sang dua bôh dêh čar hmâo pioh laih kơ tơdruă tơlơi dŏng yua, gum  djru yôm phăn amăng bruă tlaih rơngai djuai ania hlâo adih hăng bruă pơdŏng lŏn ia djop mơnuih dưm kơnar ră anai.

Anih anom mông bơkơtuai

Việt Nam lăng yôm biă hăng đing nao phun pơđĭ kyar tơlơi rô nao rai hăng Khač; hlâo dơi ha sa, djă pioh hơdră bruă “sa lŏn ia Khač”. Amăng mông bơkơtuai, dua bơnah pơdah tơlơi mơ-ak ƀơi anăp jơlan gah đĭ kyar klă, kơtang mơng bruă rô nao rai Ping gah, dua bôh dêh čar amăng hơdôm hrơi rơgao.

Khua git gai Ping gah dêh čar ta ơi Nguyễn Phú Trọng bơkơtuai hăng Khua dêh čar Khač ơi Lý Khắc Cường

Dua bơnah tŭ ư hrom amăng rơwang pơđĭ kyar phrâo mơng dua Ping gah, dua bôh dêh čar hăng amăng tơlơi jar kơmar ră anai, khom kơtưn gum hrom amăng abih bang hơdôm bruă, djă pioh na nao bruă lăi pơthâo nao rai, pơbưp gưl dlông, kơtưn đăo gơnang nao rai tơdruă bruă kơđi čar, hơkrŭ glăi pơđĭ kyar; pơtrut kơtang gum hrom gah sĭ mơdrô, tuh pơplai, pơjing phun than gơnam tam, pran pơtrut kơ tơlơi pơđĭ kyar mơng tơlơi rô nao rai dua bôh dêh čar; gum hrom ngă brơi prăk pơhrui glăi mơng gơnam sĭ nao rai dua bơnah đĭ kyar hơđong, kơjăp phik./.