VOV4.Jarai - Ngă tui Jơlan hơdră bưp mơnuih ƀôn sang hlâo kơ Tal jơnum lok 4 Khua pơ ala mơnuih ƀôn sang dêh čar ta tal 15,  Khua git gai Ping gah dêh čar ta ơi Nguyễn Phú Trọng phrâo hmâo mông bưp mơnuih ƀôn sang ƀơi 3 bôh quận Đống Đa, Ba Đình, Hai Bà Trưng, ƀôn prong Hà Nội. Lu mơnuih ƀôn sang ƀơi 3 bôh quận pơsit yôm bruă mă mơng Grŭp črâo ba bruă pơgang, pơgăn hưp ƀong kông ngăn kơnuk kơna, ngă soh dêh čar ta yua kơ Khua git gai Ping gah dêh čar ta ơi Nguyễn Phú Trọng ngă Khua Grŭp črâo ba, amăng hơdôm hrơi rơgao hmâo črâo ba khut khăt hơdôm ƀirô tơlơi phiăn pel ĕp, tơgŭ kơđi, pơsir hơdôm kơđi tơlơi hưp ƀong kông ngăn, tơlơi ngă soh.

Khua git gai Ping gah dêh čar ta ơi Nguyễn Phú Trọng bưp mơnuih ƀôn sang ƀôn prong Hà Nội

Hrom hăng anun, hơdôm bôh ƀirô Khua pơ ala mơnuih ƀôn sang, Kơnuk kơna ăt hmâo pơsir hmao tlôn laih. Pơ ala kơ Grŭp Khua pơ ala mơnuih ƀôn sang Hà Nội, Khua git gai Ping gah dêh čar ta ơi Nguyễn Phú Trọng tŭ mă hơdôm tơlơi gum pơhiăp dơlăm, pran pơsit hăng hmâo bruă gơgrong bruă mơng mơnuih ƀôn sang. Tal anai Khua git gai Ping gah dêh čar ta ăt pơdah mơn tơlơi čang rơmang Ping gah, gong gai hăng mơnuih ƀôn sang plơi prong jưh jom Hà Nội hrưn đĭ pơđĭ kyar kơtang tit, jai hrơi jai pơđĭ tui pran gơgrong Plơi prong jưh jom mơng dêh čar Việt Nam ƀu pha ra ôh hơdôm plơi prong jưh jom ƀơi rŏng lŏn tơnah./.

VOV/Siu H’ Prăk pơblang